Almatyda qoǵamdyq kólikte qolma qol aqsha tóleıtinderge jeńildik bolmaýy múmkin
ALMATY. QazAqparat - Búgin Óńirlik kommýnıkatsııalar qyzmeti alańynda «Ult jospary - Bes ınstıtýttsıonaldyq reformany júzege asyrý jónindegi 100 naqty qadam» taqyrybynda Almaty qalasy Jolaýshylar kóligi jáne avtomobıl joldary basqarmasynyń basshysy Maqsut Isahovtyń qatysýymen baspasóz máslıhaty ótti, dep habarlady «QazAqparat».
BAQ-pen kezdesýde basqarma basshysy 2016 jyly bıýdjetten basqarmaǵa 38 371 155,8 teńge bólingenin, qazirgi ýaqytta onyń 25 490 524,7-si ıgerilgenin aıtty.
Isahovtyń aıtýynsha, «100 naqty qadam» Ult josparyn júzege asyrýda transport salasyn reformalaýda birqatar sharalar atqarylǵan. Reforma aıasynda qoǵamdyq kólikterge arnaıy jol berilip, aqyly avtoturaq, velojoldar men trotaýarlardy damytý máselesi engizilgen.
Basqarma basshysy búgingi tańda qoǵamdyq kólikterge Raıymbek batyr, Tóle bı, Naýryzbaı batyr, Jeltoqsan kóshelerinde arnaıy jolaq belgilengenin aıtty. Eske sala keteıik, arnaıy jolaq byltyr Abaı dańǵylynda syzyldy. Isahov bıyl jospar boıynsha 3 myń kelesi jyly 20 myń aqyly turaq ornyn ashý josparlanyp otyrǵanyn da aıtyp ótti.
Basqarma basshysy atap ótken reforma ishinde qoǵamdyq kólikterge «Ońaı» elektrondy bıletter júıesin engizý de kirgen. Almatyda «Ońaı» júıesi jyl basynan beri iske qosylǵany belgili.
«Biz Parlamentke tarıfti dıfferentsııalaý túsinigine ózgeris engizýdi usyndyq. Bizge tarıfti dıfferentsııalaýdy bekitip berse, onda qolma qol aqshamen tóleý qymbat bolady. Al kartamen tóleý arzan bolady», - dedi Isahov.
Sonymen qatar, ol uzyndyǵy 3,1 shaqyrymdy quraıtyn Almaty qalasy metropolıteniniń birinshi jelisiniń ekinshi kezegin iske qosý, «Saryarqa» jáne «Dostyq» stantsııalarynyń qurylysy jumys kestesine saı júrgizilip jatqanyn aıtty.
