Almatyda qoǵamdyq kólikte «erekshe» kásippen aınalysyp júrgender ustaldy
ALMATY. 14 mamyr. QazAqparat - Almatyda tártip saqshylary kásibı qalta urylaryn qylmys ústinde áshkereledi.
35 jastaǵy shyǵysqazaqstandyq ózinen 2 jas kishi almatylyq serigimen ózderiniń «erekshe» jumysyn bul joly Tóle bı kóshesimen qozǵalatyn 16-shy baǵytty avtobýs ishinde júzege asyrǵan. Qoǵamdyq kólikke tosynnan mingen azamattyq kıimdegi quqyq qorǵaýshylar olardyń ury ekenin birden baǵamdaıdy.
«Jasyryn baqylaý kezinde eresekteý ury 30 jastaǵy kelinshektiń qol sómkesinen, al onyń serigi 39 jastaǵy er adamnyń qaltasynan áp-sátte qapshyǵyn qymqyrady. Eki kúdiktini quqyq qorǵaýshylar avtobýs ishinde aıǵaq zattarmen qolǵa túsirdi. Keıinnen olardyń birinde 12 myń, ekinshisinde 23 myń teńge men qujattary bolǵany anyqtaldy. Avtobýs ýaqytsha tergeý amaldaryn júrgizý úshin reısten alynyp, erikti kýálerdiń kómegimen aıǵaqtar hattalyp, tıisti qyzmet quziretine tapsyryldy», - deıdi Almaty qalasy Іshki ister departamentiniń Qylmystyq polıtsııa basqarmasynyń Múliktik qylmystardy ashý bóliminiń bastyǵy Arman Baımuqanbetov. Jyl basynda Almatyda tártip saqshylary quramynan qalta urylarymen kúres bólimi jasaqtalǵan edi. Olar 4 aıda ózgeniń qaltasyna suǵanaqtyq jasap júrgen 100 qaltamandy qolǵa túsirgen. Arman Baımuqanbetov: «bul máselemen bel sheshe kúrespese bolmaıtyn boldy. Almaty tek qana kásipker azamattardy ǵana emes, jeńil jolmen paıda tabýshylardy da qyzyqtyryp otyr. Qylmystyq pıǵyldaǵy jandar ásirese mereke qarsańyndaǵy qarbalasty utymdy paıdalanyp, qoǵamdyq kólikterde, bazarlarda óz áreketterin júzege asyrady. Onymen kóp jaǵdaıda kórshiles elder men qalalardan kelgen gastrolerlar aınalysyp otyr. Qazir azamattardy olardyń ońaı olja tabýdaǵy tabys kózine aınaldyrmas úshin arnaıy únqaǵazdar men plakattar, bılbordtar jáne rolıkter daıyndalýda», - deıdi.
