Almatyda qoǵamdyq kólikke ártaraptandyrylǵan tarıf engizý máselesi aıtyldy
ALMATY. QazAqparat - Almaty jolaýshylar kóligi jáne avtomobıl joldary basqarmasynyń basshysy Maqsut Isahov Ult josparyn iske asyrý aıasynda júrgizilgen jumystardy qorytyndylady.
Almaty ÓKQ alańynda sóz alǵan ol 2016 jyly bıýdjetten 38,3 mlrd teńge bólingenin atap ótti. Jyl basynda onyń 25,4 mlrd teńgesi ıgerildi.
Maqsut Isahovtyń aıtýynsha, «100 naqty qadam» Ult josparyn oryndaý aıasynda kólik reformasyn iske asyrý boıynsha aýqymdy jumystar atqarylǵan. Atap aıtsaq, qoǵamdyq kólikke arnalǵan arnaıy jolaqtar bólý, aqyly avtoturaqtar engizý, velosıped jolyn salý, aıaqjoldardy damytý.
Ol bıyl Raıymbek batyr, Tóle bı, Naýryzbaı batyr, Jeltoqsan dańǵyldary boıynsha qoǵamdyq kólik úshin jolaqtar engizilgenine toqtaldy.
Eske salsaq, ótken jyly arnaıy jolaq Abaı dańǵyly boıynda engizilgen.
Budan basqa, qalada jasyl bazarda aqyly avtoturaqtar ashyldy. Bıyl olardyń sanyn 3 myńǵa, kelesi jyly 20 myńǵa jetkizý josparlanýda.
Bıyl 150 myń sharshy metr aıaqjol jóndelip, salyndy. Kelesi jyly bul jumystar jalǵasyn tabady. Bıyl 40 shaqyrym velojol engizildi, bul jumys ta kelesi jyly jalǵasa beredi.
Maqsut Isahov kólik reformasynyń negizgi maqsaty - qalany kólikter úshin emes, adamdar úshin qolaıly etý ekenin atap ótti. Qoǵamdyq kólik úshin jaǵdaı jasaý, sonymen birge avtomobılderge jaǵdaıdy kúrdelendirý qajet. Bul úshin arnaıy jolaqtar bólip, aqyly avtouraqtardy kóbeıtken jón.
«Bul rette júrgizýshilerge balamaly jol usynýymyz qajet, sol úshin jumys júrgizemiz. Eger bilseńizder, shaǵyn aınalma jol jobasy bar, joǵary jyldamdyqqa arnalǵan trassa 66 shaqyrymdyq 4 kósheni biriktiredi. Bul Saın-Ál-Farabı-VOAD-Rysqulov. Onda 22 jol aıyryǵy salyndy. Bıyl Rysqulov pen Saın kósheleriniń qıylysynda eki aıyryq joldy engizdik.
Bókeıhanovta taǵy bir aıyryqty 7 jeltoqsanda ashamyz. Ony kelesi jyly tapsyramyz. Shaǵyn kólik aınalma jolyna qatysty aıtar bolsaq, aldaǵy jyly Rysqulov - Emtsov - Rysqulov - Qulja dańǵyly jolynda eki aıyryqtyń qurylysyn bastaımyz. Osylaısha, keń aınalma jolda 22 aıyryq iske qosylady, onyń 6-10 jolaǵy bar, onda baǵdarsham bolmaıdy. Qalanyń tómengi bóliginen joǵaryǵa qaraı qala ortalyǵy arqyly ótý tıimsiz. Odan da aınalma jolǵa shyǵyp, soltústikke, sosyn aınalyp ońtústikke shyqqan yńǵaıly, - dedi basqarma basshysy.
Reforma qoǵamdyq kólikti damytýdy, elektrondyq bılet berý júıesin qamtıdy. Almatyda jyl basynan bastap «Ońaı» júıesi iske qosylǵan.
«Biz Parlamentke tarıfti ártaraptandyrý uǵymyn engizýdi usyndyq. Ártaraptandyrylǵan tarıfti bekitse, qolma-qol tóleý qymbatqa túsip, kartamen tóleý arzandaıdy. Qazir ol túsinik joq bolǵandyqtan, ázirge engize almaımyz. Qazir kartamen de, qolma-qol da 80 teńge, keleshekte qolma-qol qymbattaıtyn bolady», - dep habarlady Isahov.
Budan basqa, ol Almaty metroplıtenin damytý jaıly sóz qozǵady. Qazirgi ýaqytta «Dostyq» jáne «Saryarqa» stansalarynda qurylys jumystary júrip jatyr. Jolaýshylar aǵyny 80 myńǵa artady dep kútilýde. Qazir ortasha 45 myń adamdy quraıdy. Qar qalyń túsken kúnderi olardyń sany 65 myń jolaýshyǵa artady.
