Almatyda qoǵamdyq kólik qysqa qanshalyqty daıyn
ALMATY. QazAqparat - Almaty ákimdiginde ótken baspasóz máslıhatynda qaladaǵy qoǵamdyq kóliktiń qysqa qanshalyqty daıyn ekendigi aıtyldy, dep habarlaıdy QazAqparat tilshisi.
«Qazir biz barlyq avtobýs parkterimen tyǵyz jumys istep kelemiz. Kún saıyn tekserip turamyz. Byltyr alǵashqy aıazdarda azdaǵan problema boldy. Bıyl bul qaıtalanbaıdy dep oılaımyz. Qazir tasymaldaýshylar 90-95 paıyzǵa qysqy jumystarǵa daıyn. Qysqy dóńgelekterdi jańartýǵa, antıfrız quıýǵa, qysqy dızel otynymen qamtýǵa kelisimshartqa otyryp jatyr», - dedi qalalyq Mobıldilik basqarmasy basshysynyń ókili Erlan Ádilov.
«Almatyelektrotrans» JShS dırektory Ǵanı Tájıevtiń aıtýynsha, iri tasymaldaýshy kompanııa qysqy daıyndyqqa tamyz aıynda kirisip ketken.
«Aýdıt júrgizdik. Jylytý júıesiniń tehnıkalyq ahýalyn tekserdik. Biz daıynbyz. 15 qarashada sońǵy daıyndyq júrgiziledi», - dedi Ǵanı Tájıev.
