Almatyda qoǵamdyq keńistik turǵyndardyń pikirin eskere otyryp abattandyrylady
ALMATY. QazAqparat - Qala ákimi Baqytjan Saǵyntaev «Almaty» telearnasyndaǵy Akimat live baǵdarlamasynyń tikeleı efırinde turǵyndardy megapolıstiń keńistigin abattandyrý boıynsha asyǵys qorytyndy jasamaýǵa shaqyrdy, dep habarlaıdy QazAqparat tilshisi.
Tereńqurdy rekonstrýktsııalaý sý bólgishten bastap Dostyq dańǵylyna deıingi ýchaskede, Maqataev kóshesine deıingi gıdrotehnıkalyq qurylǵylardy qosa eseptegende júrýde. Uzyndyǵy - 8,9 shaqyrym. Qazirgi kezde Kishi Almaty ózeniniń jaǵalaýyn qalpyna keltirý jumystary júrip jatyr.
Qurylys-montaj jumystary aıaqtaldy, sporttyq jáne oıyn alańdaryn ornatý jumystary jalǵasýda. Tereńqurda ekologııalyq taza materıaldardan jasalǵan zamanaýı oıyn alańy jasalady. Sondaı-aq oryndyqtar, qoqys salatyn jáshikter, jaryqtandyrý tirekteri ornatylyp,kógaldandyrylady.
Baqytjan Saǵyntaev qala turǵyndarynyń qazirgi kezde Tereńqurdy abattandyrý nátıjeleri týraly asyǵys qorytyndy jasamaýlary tıis ekendikterin atap ótti.
«Turǵyndardyń barlyq tilekteri eskeriledi.Tipti, qalalyqtar úshin jaılylyǵy jáne yńǵaılylyǵy jaǵynan osy jaıaý júrginshiler aımaǵy megapolıstegi úlgili aımaqqa aınalady»,-dedi Almaty ákimi.
Qala basshysy Abaı atyndaǵy Qazaq ulttyq akademııalyq opera jáne balet teatry janyndaǵy skverlerdi abattandyrýǵa toqtaldy.
Basty maqsat – almatylyqtar úshin erekshe qundy oryn bolyp tabylatyn osy jerdiń tarıhı kelbetin, ahýalyn, erekshe rýhyn saqtap qalý.
«Qazir «Nedelka» sýburqaǵyn qosý úshin qubyrlar tartylýda, granıt tastar tóselýde. Fontannyń áıgili arkalarynan lıýstralar alynyp, retke keltiriledi, baıyrǵy tarıhı kelbeti qaıtarylady, sodan soń ornyna qaıta qoıylady. Sándik arkalar men granıtti baspaldaqtar bólshektenbeıdi jáne súrilmeıdi. Mádenı mura nysany retinde saıabaqtyń tarıhı kelbetin qalpyna keltirý josparlanýda. Sondaı-aq, qala turǵyndarynyń tilekterin eskere otyryp, saıabaqqa jyly jaryǵy bar torsher shamdary, shoıyn oryndyqtar men qoqys jáshikteri ornatylady»,- dedi Baqytjan Saǵyntaev.
Joba aıasynda Qabanbaı batyr men Jambyl kósheleri jaǵynan skver men «Nedelka» sýburqaǵyna sholý jasaý úshin butalar men jasyl jelekterdi qaıta otyrǵyzý qarastyrylǵan.
Jasyl jelekter saıabaq ishindegi basqa jerge otyrǵyzylady. Osy jumystardy júrgizetin merdigerlik uıym jasyl jelekterge 2 jyl merzimge kútim jasaý jóninde kepildeme hat usyndy.
