Almatyda qoǵamdyq keńes qańǵybas ıtter máselesimen aınalyspaq
ALMATY. QazAqparat - Almatyda qoǵamdyq keńes qala turǵyndary úshin asa mańyzdy áleýmettik máselelermen aınalyspaq. Onyń ishinde qańǵybas ıtterdi joıý máselesi birinshi kezekte tur.
Mamandardyń aıtýynsha, bul qala turǵyndarynyń qaýipsizdigi úshin úlken mańyzy bar másele.
Jaqynda «Aqbulaq» shaǵyn aýdanynda 3 jastaǵy qyz balany qańǵybas ıtter talap óltirgen bolatyn.
«Bul adam túrshigerlik jaǵdaı. Qalada másele óte ózekti. Prezıdıýmda atalǵan is boıynsha tyńdaý ótkizemiz. Máslıhat bul problemany bir emes, birneshe ret kótergen. Bul suraqty josparǵa engizdik», - dedi Qoǵamdyq keńestiń tóraǵasy, «Turan» ýnıversıtetiniń rektory Rahman Alshanov.
Al qoǵamdyq keńes múshesi, «Alternatıva» medıatsııa ortalyǵynyń prezıdenti Anna Danılınanyń aıtýynsha jıynda tek ıtterdi aýlaý ǵana emes, ıtterdi serýenge shyǵarý erejesine qatysty máseleler de talqylanatyn boldy.
