Almatyda qoǵam jáne memleket qaıratkeri M. Sýjıkov týraly kitaptyń tanystyrylymy boldy
ALMATY. Qyrkúıektiń 18-i. QazAqparat /Erlik Erjanuly/ - Búgin Almatyda kórnekti qoǵam jáne memleket qaıratkeri Muhamedǵalı Álenuly Sýjıkov týraly "Halqym dep soqqan júregi" dep atalatyn kitaptyń tusaýkeseri ótti.
"M. Sýjıkov Reseı men Qazaqstannyń memleket júıesiniń qalyptasýyna óz yqpalyn tıgizgen iri qaıratker. Muhamedǵalı Álenuly 28 jasynda Volodar aýdandyq atqarý komıtetiniń tóraǵasy boldy. VKP(b) Ortalyq Komıtetiniń janyndaǵy Joǵary partııa mektebin bitirgennen keıin Aqtóbe oblystyq kompartııasynyń 1-shi hatshysy, 1951-54 jyldary Qazaqstan Ortalyq komıtetiniń ıdeologııa salasyndaǵy hatshysy, odan keıin Qyzylorda, Semeı, Qostanaı oblystyq kompartııasynyń 1-shi hatshysy boldy", deıdi Qazaqstan jýrnalıster akademııasynyń prezıdenti, tarıh ǵylymynyń doktory Saǵymbaı Qozybaev.
1910 jyly qyrkúıektiń 15-i kúni qazirgi Astrahan oblysy Voladar aýdany, Baklano-Lopatıno aýylynda ómirge kelgen M. Sýjıkov 1999 jyly tamyzdyń 12-si kúni dúnıeden ótken bolatyn. KSRO Joǵary Keńesiniń depýtaty, KPSS OK men Qazaqstan Kompartııasnyń múshesi bolǵan Muhamedǵalı Álenuly eren eńbegi úshin birneshe ordendermen marapattaldy. "Halqym dep soqqan júregi" dep atalatyn bul kitap onyń 100 jyldyq mereıtoıyna arnalyp otyr. Ǵumyrnamalyq jáne maqalalar men estelikter jınaǵynyń qurastyrýshylary Á. Bákir jáne B. Sýjıkova men Sh. Sýjıkova.
