Almatyda qoǵam qaıratkeri Bolathan Taıjanǵa arnalǵan memorıaldyq taqta ashyldy
ALMATY. QazAqparat - Almatyda memleket jáne qoǵam qaıratkeri Taıjan Bolathannyń qurmetine memorıaldyq taqta ashyldy, dep habarlaıdy QazAqparat tilshisi.
Taqtanyń ashylý saltanatyna qala ákiminiń orynbasary Erjan Babaqumarov, Bolathan Taıjannyń jubaıy men uly, professor M. Súleımenov, dıplomat H. Omarov, QazUTÝ prorektory Ý. Sydyqov jáne QR SІM ókildiginiń basshysy E. Ysqaqov qatysty.
Ákimniń orynbasary E. Babaqumarov óz sózinde qoǵam qaıratkeri Bolathan Quljanulynyń qoǵamymyzdyń saıası máselelerin qalyptastyrý men sheshýdegi mańyzdy rólin jáne onyń eńbegin memlekettiń joǵary baǵalaýyn atap ótti.
Almatyda Bolathan Taıjan atyndaǵy kóshe bar. Endigi onyń esimin máńgi este qaldyrý maqsatynda memorıaldyq taqta ashyldy. B.Taıjan kóp jyldar boıy tótenshe jáne ókiletti elshi bolyp istegen, keıin Almatyda turdy.
«Men bul adam óz halqyna adal adam bolǵanyn aıtqym keledi. Ol kadrlyq dıplomat boldy, sol kezde de, qazir de mundaı dıplomattar az. Óz isin jaqsy biletin jáne Qazaqstan úshin kóp is jasaǵan adam edi. Óıtkeni eń qıyn kezeń – el táýelsizdiginiń alǵashqy jyldary bolatyn. Alǵash ret baılanys ornatyp, jol salý kerek boldy jáne Bolathan qaı jerde bolsa da bul jumysty óte jaqsy oryndady. Mysaly, Iemenniń konsýly bolsa da azamat soǵysy kezinde oq astynda, óz ómirin qaterge tigip, keńes azamattaryn parohodqa aparyp, eline jibergen. Mysyrdaǵy elshi bolǵan kezde Qazaqstandy álem moıyndaý úshin kóp kúsh jumsady, sondaı-aq Egıpette Abaı atyndaǵy kósheniń ashylýyna qol jetkizdi. Al eń úlken jetistigi – onyń kómegimen Qazaqstan Islam Konferentsııasy Uıymyna kirgeni, bul orasan zor eńbek. Ol maǵan konferentsııa jabylǵan sońǵy sátte Qazaqstandy osy qýatty, tanymal uıymnyń múshesi dep jarııalaǵany týraly kóp aıtqan edi», - dedi professor M.Súleımenov.
