Almatyda QMDB Zeket qorynyń tanystyrylymy ótti
ALMATY. 30 tamyz. QazAqparat - Ótken jeksenbi kúni Almaty qalasynyń saltanat zaldarynyń birinde Qazaqstan Musylmandary Dinı basqarmasy (QMDB) aýyzashar berip,
ol jerde jýyrda ǵana qurylǵan QMDB Zeket qorynyń tanystyrylymy ótti. Aýyzasharǵa negizinen Almaty qalasynyń dinge janashyr kásipkerleri shaqyryldy, dep habarlaıdy Zeket qorynyń dırektory Edige Alpysbaı.
Sonymen qatar, keshke qatysýshylardyń arasynda osy kesh úshin arnaıy kelgen Parlament Senatynyń depýtaty, fılologııa ǵylymdarynyń doktory, professor Ádil Ahmetov, Islam mádenıeti men bilimin qoldaý qorynyń Atqarýshy dırektory Balǵabek Myrzaev, Almaty qalasy ákiminiń orynbasary Serik Seıdýmanov sııaqty qadirli qonaqtar da boldy.
Azan aıtylyp, qonaqtar aýyzdaryn ashyp bolǵannan keıin, alǵashqy bolyp Qazaqstan Musylmandary Dinı basqarmasy jáne Orta Azııa Múftıler keńesiniń tóraǵasy, Bas múftı Ábsattar qajy Derbisáli sóz sóılep, salıqaly keshti ashty. Ol óz sózinde qonaqtardy qasıetti Ramazan aıymen, kele jatqan Aıt merekesimen, Konstıtýtsııa kúnimen quttyqtaı kelip, olarǵa dástúrli dinimizdi keńinen nasıhattaý jolyndaǵy jumystarǵa qoldaý kórsetip kelgenderi úshin alǵys bildirdi. Sonymen qatar, jýyrda Dinı basqarmanyń arnaıy Zeket qorynyń qurylǵanyn aıtyp, onyń basty maqsattaryna toqtalyp ótti.
Odan keıin kelgen qonaqtarǵa Zeket qory týraly daıyndalǵan beınefılm kórsetilip, onyń qurylý maqsattary men jumys jopary jaıly keńinen baıandaldy.
Sonyń artyn ala, Zeket qorynyń Qamqorlar keńesiniń tóraǵasy retinde taǵaıyndalǵan senator Ádil Ahmetov sóz alyp, Qazaqstandaǵy jáne álemdegi dinı ahýaldarǵa keńinen toqtala kelip, Zeket qorynyń qajettiligi men mańyzdylyǵy týraly óz pikirin bildirdi.
Sonymen qatar, kesh barysynda Almaty qalasy ákiminiń orynbasary Serik Seıdýmanov, Qajylar qaýymdastyǵynyń tóraǵasy Erkin Dýanaev, Islam mádenıeti men bilimin qoldaý qorynyń atqarýshy dırektory Balǵabek Myrzaev jáne qonaqtar arasynan keıbir kásipkerler de shyǵyp sóz sóılep, óz kezekterinde qurylyp jatqan Zeket qorynyń kókeıkestiligi men qajettiligin tilge tıek etip, óz taraptarynan Qorǵa qoldaý retinde túrli somalardy atap, shynaıy peıilderin is júzinde de kórsete bildi.
Kesh barysynda Jáken Omarov jáne Melomen toptarynyń oryndaýynda mándi de maǵynaly dinı ánder shyrqalyp, qonaqtardyń kóńilderin marqaıta tústi.
Aýyzashardyń sońynda, kelgen qonaqtarǵa Islam mádenıeti men bilimin qoldaý qorynyń qoldaýymen basylǵan birneshe kitaptar toptamasy syıǵa tartyldy.
QMDB Zeket qory - Zeket jáne qaıyrymdylyq sadaqalaryn qabyldap, ony Sharıǵat úkimderine saı taratýdy júzege asyratyn, halyqaralyq tájrıbege súıengen, ulttyq múddeni kózdegen, kásibı basqarý júıesine negizdelgen zamanaýı áleýmettik-qarjylyq ınstıtýt.
