Almatyda klımattyq táýekelderdi basqarý týraly konferentsııa ótti
ALMATY. 23 tamyz. QazAqparat - Aýa raıynyń ózgerýi sońǵy jyldary aıqyn baıqala bastady. Bul týraly búgin Almatyda ótip jatqan «Qazaqstandaǵy klımattyq táýekelderdi basqarýdaǵy vedomstvoaralyq yqpaldastyqty nyǵaıtý» dep atalatyn konferentsııada aıtyldy.
«Aýa raıynyń ózgerýi álemdik deńgeıdegi eń kúrdeli máseleniń biri. Oǵan sońǵy kezde dúnıejúzilik deńgeıde ǵylymı mekemeler, ǵalymdar qatty mán berýde. Sondyqtan da búgingi ótken konferentsııanyń mańyzy óte joǵary. Ǵylymı túrde dáleldengen mynandaı bir jáıt bar. Árbir bes jyldyń úsheýi barynsha qolaıly bolsa, ekeýinde qurǵaqshylyq orny alady. Qurǵaqshylyq kezinde jylýdyń ózgerisi buryn asa qatty bilinbeıtin. Qazir bul ahýal ózgerýde», - deıdi Qazaq mal sharýashylyǵy jáne mal azyǵy ǵylymı-zertteý ınstıtýtynyń bas dırektory Ábdiraqym Ombaev. Onyń aıtýynsha, aýa raıynddaǵy ózgerister qubylysyn zertteýge múmkindik mol. Ony zertteýge Qazaqstan óz úlesin qosýda. Bul baǵyttaǵy taldaýlardy júrgizýge Qazaqstanda tolyq múmkinshilik bar.
