Almatyda klıenttiń joǵalǵan qujaty arqyly bank operatsııalaryn júzege asyrǵan alaıaq ustaldy
ALMATY. 10 qarasha. QazAqparat /Erlik Erjanuly/ - Almatyda "Qazkommertsbanktiń" qaýipsizdik qyzmetkerleri joǵalǵan qujat arqyly bank operatsııalaryn júzege asyrǵan alaıaqty qolǵa túsirdi.
Kóktemde qala turǵyndarynyń biri jeke kýáligi men Qazkommertsbank shyǵarǵan tólem kartochkasyn joǵalyp alady. Ony taýyp alǵan azamatsha óziniń túr kelbetiniń uqsastyǵyn paıdalanyp, qujatty óziniń aram oıyna paıdalanýǵa tyrysady. Aldymen quzyrly organdardan qujat ıesiniń STN men ÁJK túpnusqalaryn qalpyna keltirip, odan keıin qazaqstandyq bankterdiń birinen 220 myń teńgeniń jedel-kredıtin rásimdeıdi. Sondaı-aq onyń shotynan 20 myń teńgeni shyǵaryp alyp kartochkany qulyptap, óz atyna basqa kartochka shyǵaryp alady.
Al óz kartochkasynyń qulyptalǵanyn qazan aıynda ǵana bilgen zardap shegýshi onyń jaı-japsaryn anyqtaý úshin bank qyzmetkerlerine júgingen kezde, belgisiz bir azamatshanyń óz esebinen belgili bir kólemde qarajat shyǵaryp alǵanyn biledi. Osy jaıtqa baılanysty banktiń qalalyq fılıalynyń Ekonomıkalyq qaýipsizdik basqarmasy qyzmetkerleriniń jyldam ári der kezinde jasalǵan áreketteriniń nátıjesinde alaıaqtyqqa qatysty kúdikti adamnyń túr álpeti barlyq bólimshelerge jiberiledi. Al aıdyń aıaq sheninde fılıal bólimsheleriniń birindegi qyzmetkerler Janar Demequlova men Juldyz Myńjasarova kezekti opratsııasyn jasaýǵa kelgen ony tanyp qalady. Alaıaqty qolǵa túsirgen Bostandyq aýdandyq ishki ister basqarmasynyń polıtseıleri qazir jınalǵan materıaldar negizinde onyń ústinen qylmystyq is qozǵap otyr.
