Almatyda klassıkalyq mýzyka kontserti ótedi
ALMATY. 2 sáýir. QazAqparat - Almatyda 4 sáýirde Jambyl atyndaǵy Qazaq memlekettik fılarmonııasynda klassıkalyq mýzyka kontserti ótedi.
Ol Qorqyt qorynyń 10 jyldyǵyna jáne Qurmanǵazy atyndaǵy qazaq ulttyq konservatorııasynyń opera-sımfonııalyq bóliminiń 20 jyldyǵyna arnalyp otyr.
«Oǵan N. Tilendıev atyndaǵy «Otyrar sazy» folklorly-etnografııalyq orkestri, A.Jubanov atyndaǵy arnaıy mýzykalyq mektep-ınternattyń «GIOVANI TALENTI» kameralyq orkestri, QR Memlekettik akademııalyq sımfonııalyq orkestri qatysady.
«Qobyzshy Yqylastyń «Kertolǵaýymen» bastalatyn bul kontsertte ulttyq, halyqtyq jáne sheteldik klassıkalyq týyndylar oryndalady», - deıdi «Qorqyt» qorynyń dırektory, mýzykatanýshy Dana Meıirbekova.
Onyń aıtýynsha, shara barysynda «Shekarasyz mýzyka» jáne «Skrıpkaǵa saıahat» dep atalatyn DVD dıskilerdiń tanystyrylymy bolady. «Shekarasyz mýzyka» Qorqyt qorynyń ótken jyly ótkizgen kontsertiniń, al «Skrıpkaǵa saıahat» Ahan Meıirbekovtyń áıgili ıtalıandyq skrıpka sheberi Franchesko Bıssolottıdiń ustahanasyna baryp, skrıpkasyn syılyqqa alǵanǵa deıingi sapary túsirilgen.
«Bizdiń barlyq kontsertterimiz altyn qorǵa endi. Endi «Mádenıet» arnasynyń qoryn tolyqtyryp jatyrmyz. Demeýshilerdiń kómegimen jyl saıyn kontsertterimizdiń DVD dıskileri shyǵarylyp jatyr. Bul kontsert te bolashaqta jeke jınaq retinde shyǵarylady. Oǵan jeke oryndaýshylardan QR Eńbek sińirgen qaıratkerleri Aıda Aıýpova, Dına Hamzına, Rymkesh Jumalıeva jáne halyqaralyq baıqaýlardyń laýreattary Ahan jáne Abylaıhan Meıirbekovter qatysady. Sondaı-aq QR Eńbek sińirgen qaıratkerleri Abzal Muhıtdınov, Dinzýhra Tilendıeva jáne Ánýar Núsipbaev, Erbolat Ahmedııarov, Gúlmıra Býenbaeva, Arman Orazǵalıev, Músilim Ámze, Ahan Meıirbekov, Arman Júdibaev, Berik Jaılaýbaev dırıjerlik etedi», - dedi D.Meıirbekova.
