Almatyda KitapFest kitap festıvaline 2 myńǵa jýyq adam qatysty (FOTO)
ALMATY. QazAqparat - Búgin Almatyda Mádenıet jáne demalys ortalyq saıabaǵynda KitapFest 2-shi qalalyq kitap festıvali ótti. Oǵan uıymdastyrýshylardyń aıtýynsha shamamen 2 myńǵa jýyq adam qatysty.
«Bul festıval osymen ekinshi jyl uıymdastyrylyp otyr. Endi aldaǵy ýaqytta ony dástúrli festıvalge aınaldyrý oıymyzda bar. Bul festıvaldi uıymdastyrýdaǵy basty maqsat - adamdardy kitap oqýǵa tartý. Ásirese - jastardy. Óıtkeni olar, qazirgi tańda aqparattyq tehnologııanyń qaryshtap damýynyń arqasynda kitapty óte sırek oqıtyn bolyp barady. Al kitap - bizdiń rýhanı baılyǵymyz. Onyń ornyn eshqandaı elektrondyq oqý quraldary basa almaıdy», - dedi búgingi sharany uıymdastyrýshy uıym «Baýyrjan» qaıyrymdylyq qorynyń menedjeri Aınur Sálimbaeva. Ol sonymen qatar, bıylǵy festıvaldiń balalar ádebıetine arnalǵandyǵyn jetkizdi. «Búgingi sharaǵa qaladaǵy iri 10 baspa mekemesi men 6 kitap dúkeni qatysyp, arzandatylǵan baǵamen balalar ádebıetin satty. Tańerteń kelýshiler sany óte kóp boldy. Arnaıy esep júrgizilmegenimen qazirgi ýaqytqa deıin kelýshiler sany 2 myńǵa jýyqtady. Sonymen qatar, búgingi festıval aıasynda «Balalarǵa kitap syıla» aktsııasy da júrgizildi. Onda nıet bildirýshiler balalarǵa arnalǵan kórkem ádebıet nemese basqa da tanymdyq kitaptardy ákelip bizge syılap jatty. Bul kitaptar keıin qaladaǵy Balalar hırýrgııasy jáne pedıatrııa ortalyǵynda emdelip jatqan balalarǵa tegin taratylatyn bolady», - dedi A. Sálimbaeva. Aıta ketken jón, búgin festıval aıasynda «Almaty qalalyq ortalyqtandyrylǵan kitaphana jelisi» memlekettik mekemesi birqatar kitap kórmelerin uıymdastyrdy. Olardyń ishinde Uly Otan soǵysynyń 70 jyldyǵy men uly aqyn Abaı Qunanbaevtyń 170 jyldyǵyna arnalǵan kitap kórmelerin aıtýǵa bolady.
