Almatyda kitap mádenıetine zor úles qosqan baspa isiniń úzdikteri marapattaldy
QR Ulttyq memlekettik kitap palatasynyń dırektory Janat Seıdýmanovtyń aıtýynsha, QR Baspasóz kúni men QR Táýelsizdigi kúnine oraı jylyna eki ret beriletin «Kitap mádenıetine qosqan zor úlesi úshin» medalin marapattaý komıssııasyna bul joly 40-tan astam usynys túsip, onyń 26-sy laıyqty dep tabylǵan. Onda azamattardyń kitap mádenıetin arttyrýǵa qosqan jeke úlesi, shyǵarmashylyq eńbek pen adal qyzmeti jáne kitap mártebesin arttyrýdaǵy rýhanı izdenisteri basshylyqqa alynǵan. Oǵan ıe bolǵandar arasynda aqyn, dıplomat, qoǵam qaıratkeri Oljas Súleımenov, «Jersý» ınvestıtsııalyq-óndiristik korporatsııasynyń baqylaý keńesiniń tóraǵasy Baýyrjan Ospanov, ál-Farabı atyndaǵy QazUÝ Baspa isi jáne dızaın kafedrasynyń meńgerýshisi Saǵatbek Medeýbekuly, «Dáýir» baspasynyń bas dırektory Svetlana Nazarbaeva bar. Al QR Mádenıet jáne aqparat mınıstri Muhtar Qul-Muhammed, Qazaqstan Jazýshylar odaǵynyń Basqarma tóraǵasy, senator Nurlan Orazalın, «Jibek joly» baspasynyń dırektory Baqytjan Qanapııanov «Bizdi kitapqa degen súıispenshiligimiz biriktiredi» halyqaralyq ordeniniń ıegerleri atandy. Sondaı-aq baspager, jazýshy-ǵalym Raıhan Májenqyzy I.Fedorov atyndaǵy «Polıgrafııa jáne baspa isindegi eńbegi úshin» medalimen marapattaldy.
