Almatyda kisi óltirgen kúdikti tutqyndaldy - Almaty ІІD
ALMATY. QazAqparat-Almatyda kisi óltirgen degen kúdikpen Qyzylorda oblysynyń 32 jastaǵy turǵyny tutqyndaldy. Bul týraly búgin Almaty ІІD baspasóz qyzmetinen habarlady.
Esterińizge sala ketelik, 2016 jyldyń 29 maýsymynda «Qalqaman» shaǵynaýdanynda eki jas azamattyń arasyndaǵy janjaldyń saldarynan 1994 jyly týǵan T. esimdi azamat oq tıip jaraqattanǵan edi. Ol qaladaǵy aýrýhanalardyń birinde esin jımaǵan kúıi kóz jumdy.
«Bul derek Naýryzbaı aýdandyq ishki ister basqarmasynda QR Qylmystyq Kodeksiniń 99-shy baby (kisi óltirý) boıynsha sotqa deıingi tergeýdiń biryńǵaı tizilimine engizilgen bolatyn.
Qylmystyń betin ashý úshin, arnaıy tergeý-jedel toby quryldy. Top músheleri jedel-izdestirý sharasynyń alǵashqy saǵatynda-aq, janjalǵa qatysqandardyń barlyǵynyń jáne solardyń ishinde oq atqan azamattyń aty-jónin anyqtady. Ótken demalys kúni asa aýyr qylmys jasaǵan degen kúdikpen Qyzylorda oblysynyń 32 jastaǵy turǵyny ustaldy. QR Qylmystyq is júrgizý Kodeksiniń 128-babyna sáıkes, A. esimdi azamat ýaqytsha tergeý abaqtysyna toǵytyldy. Jaqyn ýaqytta oǵan qatysty sotqa deıingi tergeý kezeńi aıasynda bultartpaý sharasy taǵaıyndalady. Qylmys quraly tárkilenip, qylmystyq istiń materıalyna tirkeldi», - dedi Almaty qalalyq ІІD Krımınaldy polıtsııa basqarmasynyń bastyǵy, polıtsııa podpolkovnıgi Janbolat Zıadın.
