Almatyda qısaıǵan úıdi qalpyna keltirý qashan aıaqtalady
ALMATY. QazAqparat – Almatyda Zerdeli-6 shaǵynaýdanyndaǵy № 1/179 úıdi qalpyna keltirý jumystary 9 maýsymda aıaqtalady. Bul týraly «Qazaq qurylys jáne sáýlet ǵylymı zertteý jáne jobalaý ınstıtýty» AQ basqarýshy dırektory Eraly Shoqbarov aıtty, dep habarlaıdy QazAqparat tilshisi.
Onyń aıtýynsha, qısaıǵan úıdi jóndeý 4 kezeńmen júrgizilgen.
«Qalpyna keltirý jumystary aqpanda bastaldy. Qazir sońǵy kezeń – úıdi nyǵaıtý, tikteý jumystary aıaqtaldy. Birinshi kezeńde úıdi aınala irgetastyń deńgeıinen tómen fıltrge qarsy ekran ornatyldy. Ekinshi kezeńde bir qatarda turǵan № 179, 178, 177 úılerdiń arasyn bóletin ekran ornatyldy. Úshinshi kezeńde úıdiń qısaıǵan jaǵyna qarama-qarsy tusynan topyraq alynyp, úıdiń qabyrǵasy tikteldi. Gıdravlıkalyq baqylaýlarǵa sáıkes úıdiń vertıkaldy negizi tikteldi. Tórtinshi kezeńde úıdiń irgetas taqtasyna baılanystyra otyryp, úı perımetri boıynsha qadalar ornatyldy. Qazir úı túbine sý ketpes úshin topyraq alynǵan tustar toltyrylyp jatyr», - dedi Eraly Shoqbarov.
Osylaısha, qalpyna keltirý jumystaryn 9 maýsymda aıaqtaý kózdelip otyr.
Eske salaıyq, Almatyda Zerdeli shaǵynaýdanynda kópqabatty úıdiń qabyrǵasy bir jaǵyna qısaıa bastaǵan soń turǵyndar dabyl qaqqan bolatyn.
2019 jyldyń sońǵy aılarynda bastalǵan úıdiń negizi men tirek konstrýktsııalaryn júıeli túrde zertteý, ǵımarattyń kún saıynǵy qısaıýyn ólsheý jáne onyń múmkin bolatyn serpinin qadaǵalaý QazQSǴZI zerthanasynyń mamandaryna osy úıde turý qaýipsizdigine qatysty aldyn ala qorytyndy berýge múmkindik berdi.
Mamandardyń málimeti boıynsha, qalpyna keltirý jumystary aıaqtalǵannan keıin úı odan ári paıdalanýǵa jaramdy bolady.
Qazir barlyq turǵyndar qala ákimshiligi esebinen jalǵa beriletin baspanamen qamtamasyz etilgen. Balalaryn balabaqshalar men basqa da bilim berý mekemelerine ornalastyrýǵa kómek kórsetildi.
Almaty ákimi Baqytjan Saǵyntaev esepti kezdesýinde atalmysh shaǵynaýdan turǵyndarynyń saýalyna jaýap bergen bolatyn.
