Almatyda qısaıǵan kópqabatty úılerdi zertteý jumystary qashan aıaqtalady
ALMATY. QazAqparat – Almatyda «Zerdeli-6» shaǵyn aýdanynda qısaıyp ketken kópqabatty 6 turǵyn úıdiń zertteý jumystary 2020 jyldyń qarasha aıynda aıaqtalady. Bul týraly qala ákimdiginen málim etti, dep habarlaıdy QazAqparat tilshisi.
Almatynyń Jaıly qalalyq orta basqarmasynyń málimetinshe, № 1/179 úıdiń vertıkal jaǵyn qalpyna keltirýge jáne nyǵaıtýǵa 196 mln teńge bólingen. Sonymen qatar, turǵyndardy ýaqytsha ornalastyrý úshin tótenshe jaǵdaı aıasynda jergilikti bıýdjet rezervinen 32 mln teńge qarastyrylǵan.
Budan bólek, taǵy 312 mıllıon teńge toǵyz qabatty barlyq 32 turǵyn úıge tekserý júrgizýge baǵyttaldy. Ol úshin «QazQSǴZI» AQ-men shart jasaldy.
«Zertteý nátıjeleri boıynsha bul úılerdiń qısaıýy anyqtalǵan joq. Berilgen qorytyndylar men usynymdarǵa sáıkes qurylystardyń shógýine jol bermeý maqsatynda irgetastardyń negizin nyǵaıtý boıynsha jumystar júrgizý qajet. Turǵyn úılerdiń irgetasyn nyǵaıtý jumystary kezinde turǵyndar kóshirilmeıdi, sebebi olarǵa qaýip joq. Nyǵaıtý jumystary kezeń-kezeńmen júrgiziledi. Bıyl 6 úıdi nyǵaıtý boıynsha is-sharalar josparlanǵan. № 1/160, 1/161 kópqabatty úıdi nyǵaıtýǵa 271 mln teńge bólindi.
«QazQSǴZI» AQ jasalǵan kelisimshartqa sáıkes barlyq turǵyn úılerge zertteý jumystary júrgiziledi. Jumystyń aıaqtalý merzimi - 2020 jyldyń qarashasy. Osydan keıin naqty soma belgili bolady», - dedi Almaty ákimdiginen.
Eske salaıyq, byltyr 11 jeltoqsanda Alataý aýdanyndaǵy «Zerdeli» shaǵyn aýdanynyń turǵyndary úıleriniń qısaıǵanyn aıtyp, dabyl qaqqan bolatyn.
Keıin Baqytjan Saǵyntaev qısaıǵan úıdiń turǵyndarymen kezdesip, ákimdik olardy kóshirýge daıyn ekenin jetkizdi.
