Almatyda qısaıǵan kópqabatty úıdiń turǵyndaryna páter jaldaý úshin ótemaqy berildi
ALMATY. QazAqparat - Almatyda «Alǵabas-6» shaǵyn aýdanyndaǵy qısaıǵan kópqabatty turǵyn úıdiń 17 otbasyna ózderi tańdaǵan ýaqytsha páterdi jaldap turýy úshin ótemaqy berildi. Bul týraly búgin osy úıdiń turǵyndarymen kezdesý barysynda Alataý aýdanynyń ákimi Baǵdat Manzorov málim etti.
Belgili bolǵanyndaı, turǵyndarǵa osy shaǵyn aýdanda ýaqytsha baspana alý nemese jaldamaly baspana úshin ótemaqy alý usynyldy. Onda olar jańadan turǵyn úı salynǵansha turatyn bolady. Al jańa turǵyn úı jarty jyl ishinde salynyp bitedi. Turǵyndar 1 jeltoqsanǵa deıin páterli bolady dep kútilýde.
B. Manzorovtyń aıtýynsha, búgin taǵy 10-15 adamǵa ýaqytsha baspananyń kilti tabys etiledi. Aldaǵy 2-3 kún ishinde bul másele tolyǵymen sheshiledi. Turǵyndardyń barlyǵy ýaqytsha páterlege ornalastyrylady.
Buǵan deıin «Astana Qurylys» Ulttyq qurylys kompanııasy» AQ dırektory Bekbolat Amantýrlın Alǵabas aýdany boıynsha baspana jaldaý baǵasyn jarııalaǵan bolatyn.
Turǵyndarǵa bir bólmeli páterdi jaldaý úshin beriletin aqshanyń kólemi - 40-50 myń teńge, eki bólmeli páter úshin - 50-60 myń teńge jáne úsh bólmeli páter úshin - 60-70 myń teńge.
«17 otbasyna ótemaqy berildi. Olar bul aqshaǵa ýaqytsha baspanany ózeri izdep tabady. Al bizdiń taraptan jalǵa beriletin turǵyn úıden ýaqytsha páter jaldaǵylary keletinderge ýaqytsha baspana beriledi. Qazir 42 otbasymen aldyn ala kelisim jasap qoıdyq», - dedi B. Amantýrlın.
Bul baǵalardy estigen turǵyndar jaǵasyn ustady. Olardyń aıtýynsha, mundaı ótemaqyaǵa Alǵabas shaǵyn aýdanynan páter jaldaý múmkin emes. Onyń ústine jalǵa berýshiler ótemaqydan 10 paıyzdyq kiris salyǵyn ustalynady.
