Almatyda kireberiste turǵan balalar arbasyn órteıtinder paıda boldy
ALMATY. QazAqparat - Almaty qalasy Tótenshe jaǵdaılar departamenti balarǵa arnalǵan arbalardyń jappaı janýynyń jıilep ketkenin málim etti, dep habarlaıdy QazAqparat tilshisi.
Departament taratqan málimetke sáıkes, 2020 jyldyń 6 qazannan bastap búgingi kúnge deıin kóppáterli turǵyn úılerdiń kireberisterindegi arbalar men velosıpedterdi órteýdiń 35 jaǵdaıy tirkelgen.
«Tek 2020 jyldyń 6 qazany men 25 jeltoqsan aralyǵynda megapolıste túngi ýaqytta 20 órt tirkeldi. Sonymen qatar bir kúnde birneshe órt oqıǵalary boldy. Atap aıtar bolsaq, 2020 jyldyń 7 qarashasynda tańǵy saǵat 7-den 10-ǵa deıingi ýaqytta Bostandyq aýdanynda № 2,14,28 «Qazaqfılm» jáne №5, 33 «Almagúl» shaǵynaýdandarynyń kópqabatty úılerinen shaqyrtý tústi. Birden 5 brıgada jumyldyryldy. Sondaı-aq 2021 jyldyń 27 aqpanynda tańǵy saǵat 7-den bastap, 10-ǵa deıingi ýaqyt aralyǵynda órt sóndirýshiler Bostandyq aýdanynyń «Kóktem» shaǵyn aýdanynda 3 mekenjaı boıynsha órtti sóndirdi»,-dep atap ótti Tótenshe jaǵdaılar departamentinen.
Sondaı-aq qalanyń tórt aýdanynda, atap aıtqanda Almaly, Áýezov, Bostandyq, Medeý aýdanydaǵy turǵyn úılerdiń kireberisterinde 15 bala arbasynyń janý deregi tirkelgen. Oǵan qosa basqa da turmystyq zattar órtengen.
«Júrgizilgen tekserý is-sharalaryna sáıkes, barlyq jaǵdaılarda órttiń qasaqana jasalǵandyǵy anyqtaldy. Qazirgi ýaqytta materıaldar Almaty qalasynyń polıtsııa departamentine joldandy. Sonymen qatar Qazaqstan Respýblıkasyndaǵy Órt qaýipsizdigi erejelerinine sáıkes baspaldaq torlarynyń astynda, sondaı-aq evakýatsııalyq joldarǵa kedergi keltiretin úı turmystyq zattardy, ıaǵnı balalar arbalary, shanalar, velosıpedter men jıhaz jınaýǵa tyıym salynady», - delingen habarlamada.
Osyǵan baılanysty, turǵyndardyń arasynda jaraqat alý, sondaı-aq órt kezinde materıaldyq shyǵyn keltirý jaǵdaılaryn boldyrmaý maqsatynda TJD Almaty qalasynyń turǵyndarynan podezderde bala arbalaryn, velosıpedterin qoımaýǵa shaqyrady.
