Almatyda kınoteatrlar qaıta jabyla ma
ALMATY. QazAqparat – Eger kelýshilerdiń biri koronavırýsty kınoteatrdan juqtyrǵany anyqtalsa, ol jabyla ma? Bul suraqqa onlaın brıfıng barysynda Almatynyń bas sanıtarlyq dárigeri Jandarbek Bekshın jaýap berdi, dep habarlaıdy QazAqparat tilshisi.
Jandarbek Bekshın Qazaqstannyń bas sanıtarlyq dárigeriniń № 57 qaýlysyna sáıkes, Almatydaǵy kınoteatrlardyń jumys isteýine ruqsat berilgenin atap ótti.
«Kelýshilerdiń bireýi aýrý juqtyrsa, kınoteatrlar jabylmaıdy. Infektsııa faktisi rastalsa, onda ol qarqyndy túrde dezınfektsııalanady. Eger ınfektsııanyń qaıtalanǵan jaǵdaılary bolsa, onda bul kınoteatr jabylýy ábden múmkin. Bul másele áli de qarastyrylatyn bolady. Biz barlyq turǵyndar men kásipkerlerden densaýlyq saqtaý mınıstrliginiń barlyq profılaktıkalyq sharalary men talaptaryn oryndaýdy suraımyz», - dep jaýap berdi Jandarbek Bekshın.
Eske salaıyq, Almatydaǵy kınoteatrlarǵa 26 qazannan bastap jumys isteýge ruqsat berilgen.
Buǵan deıin qaladaǵy kınoteatrlardyń qalaı jumys isteıtini týraly habarlanǵan bolatyn.
