Almatyda kımeshek týraly arnaıy kitap shyǵarylǵaly jatyr
ALMATY. 23 shilde. QazAqparat /Erlik Erjanuly/ - "Altyn arqaý" mádenı-etnografııalyq qoǵamdyq birlestiginiń tóraıymy, QR Bilim berý isiniń úzdigi, jýrnalıst, etnograf Ǵalııa Qaıdaýylqyzy "Kıeli kımeshek" degen monografııalyq zertteýin baspaǵa ázirleýde. Avtordyń aıtýynsha, qazaq áıelderiniń ulttyq kıimi týraly kitap jyl sońyna qaraı jaryq kórmek.
"Áıel zaty úshin basyn syılata bilý barlyq ýaqytta ómirsheń qaǵıda bolyp eseptelgen. Ony sonaý erte zamandarda tasqa qashalǵan sýretterden de anyq baıqaýǵa bolady. Ondaǵy áıelder denesi ashyq bolsa da basyn japyraqpen, destemen japqan. Áıel zatynyń basyn jaýyp júrýi tek ádemiliktiń kórinisi emes. Ol ózin-ózi saqtaýdyń jáne qurmettelýdiń bir joly", -deıdi ol. Buǵan deıin ol kıeli kımeshek degen kıimderdiń 40 túrli toptamasyna memlekettik patent alǵan edi. Ol búkil álemde balamasy joq degen belgi. "Patent alý bul kıeli dúnıege halqym ıelik etse degen nıetten týyndaǵan is. Mysaly, dúnıejúzinde áıelderdiń bireýi qalpaǵyn, bireýi telpegin, bireýi taqııasyn, bireýi oramalyn, bireýi hıdjabyn, bireýi párenjesin álpeshtep jatady ǵoı. Endi kımeshek degen bir aýyz sóz qazaqtyń kıim úlgisi eken dep atalyp ketse meniń búkil maqsatym oryndaldy dep esepteımin", - deıdi Ǵalııa Qaıdaýylyzy. Onyń paıymdaýynsha, kımeshek taqylettes búrkenshek jalpy búkil álemge tán kıim úlgisi. Deı turǵanmen bizdiń kımeshektiń ereksheligi onyń máni, sáni jáne mazmunynyń ózara úılesim tabýy bolyp otyr.
