Almatyda kileń qymbat kólik urlaǵan uıymdasqan top qolǵa tústi
ASTANA. 16 mamyr. QazAqparat - Almaty qalasynda 25 jáne 27 jas aralyǵyndaǵy eki jigit pen bir qyzdan qurylǵan qylmystyq top quryqtaldy.
Bul týraly búgingi baspasóz máslıhatynda QR Іshki ister mınıstrliginiń resmı ókili Nurdildá Oraz málim etti.
Olar qymbat markaly kólikterdi urlaýmen aınalysqan. Máselen, bıylǵy jyldyń naýryz-sáýir aılarynda atalǵan qylmystyq top «Toıota Kamrı-30», «Toıota Lend Krýzer Prado», «Daımler kraısler», «Mersedes Bents» avtokólikterin aıdap ketken. Onyń aldynda qylmystyq toptyń múshesi - boıjetken qyz túngi klýbtarda jáne basqa da qoǵamdyq jerlerde aýqatty jigittermen tanysyp, senimine kirgennen keıin, kólik kiltiniń kóshirmesin jasap otyrǵan. Al onyń sybaılastary ol kólikterdi urlap satqan. Tekserý sharalary barysynda ustalǵandardyń garajynan úsh avtokólik tabyldy. Olar ıelerine qaıtaryldy. «Qazirgi kezde qylmystyń taǵy bir qatysýshysy jáne urlanǵan «Mersedes-bents» atomashınasy izdestirilýde», - deıdi N.Oraz.
