Almatyda «Kıeli Qazaqstan» kópkúndik ekspedıtsııasy bastaldy
25 tájirıbeli shabandozdan quralǵan top salt atty saıahatqa arnalǵan baǵyt-baǵdar qurý úshin jaqyn aımaqty zertteıdi. Ekspedıtsııanyń qorytyndysy boıynsha Almaty oblysynyń eń kórikti jerlerin aralap, týrısterge arnalǵan marshrýttar syzylyp, kartalar jasalady.
Uıymdastyrýshylardyń aıtýynsha, salt atpen serýendeý týrızmi dúnıejúzinde keńinen tanymal. Al onyń tarıhy bizdiń elmen tyǵyz baılanysty, sondaqtan Qazaqstan salt atty týrızmniń álemdik ortalyǵy bolýy tıis.
«Bizde salt atty týrızmdi damytýǵa barlyq jaǵdaı bar. Tamasha tabıǵat, sheksiz jazyq dala, bıik taý - osynyń bári adamdardyń balalyq shaǵynan bastap atqa minip serýendeý ónerin ıgerýge múmkindik berdi. Atqa miný - qazaq halqynyń qanynda bar óner. Sondyqtan, Qazaqstandy at týrızminiń álemdik ortalyǵy etý - bizdiń mindet-maqsatymyz. Ol úshin on myńdaǵan shaqyrymdy zerttep, júzdegen marshrýttardy qurastyrýǵa týra keledi», - deıdi «Kazakh Tourism» UQ» AQ bas menedjeri Alına Ashlıaeva.
Atty ekspedıtsııaǵa qatysýshylar Almaty oblysynyń Almaty-Batan shatqaly, Oı-Qaraǵaı traktisi - Assy observatorııasy - Qara-Arsha shatqaly, Jińishke ózeni, Amanjol, Kólsaı kóli, Qaıyńdy ózeni men Qaıyńdy kóline barady.
Ekspedıtsııa toby kúnine 16 shaqyrym joldy eńseredi. Ýaqytynyń kóbi foto men vıdeo túsirýge ketedi. Ekspedıtsııa 12 kúnge sozylady.
«Bizdiń baǵyt - Almatydan Túrgen shatqalyna deıin. Aldymen biz altyn adam tabylǵan Esik murajaıyna baramyz. Odan keıin atpen Aıýly jáne Úlken Qaıraq sarqyramalaryna barýdy josparlap otyrmyz», - deıdi travel-bloger Laýra Asqar.
Onyń aıtýynsha, mundaı ekspedıtsııalar elimizde atty týrızmdi damytyp qana qoımaı, sheteldik týrısterdi tartýǵa da yqpal etedi.
Ekspedıtsııa QR Mádenıet jáne sport mınıstrliginiń Týrızm ındýstrııasy komıtetiniń tapsyrysy boıynsha jáne «Rýhanı jańǵyrý» baǵdarlamasy aıasynda ótip jatyr. Uıymdastyrýshy - «Kazakh tourism» AQ.
Avtor: Alma Muqanova
