Almatyda QHA 20 jyldyǵy qurmetine marapattar tabys etildi (FOTO)
«Qazaqstan halqy Assambleıasynyń jyly aıaqtalyp keledi. Osy jyl aıasynda kóp jumystar atqaryldy. Buǵan búgingi sharaǵa kelip otyrǵan qonaqtarymyz belsene atsalysty. Sondyqtan, Qazaqstan halqy Assambleıasynyń 20 jyldyǵynyń laıyqty deńgeıde atap ótilýine qomaqty úles qosqan etnomádenı birlestikterdiń ókilderine, memleket, qoǵam, mádenıet jáne óner qaıratkerlerine, sondaı-aq BAQ ókilderine sheksiz alǵysymdy bildiremin», - dedi óz sózinde Almaty qalasy Qazaqstan halqy Assambleıasy hatshylyǵynyń meńgerýshisi Margarıta Abdalıeva.
Marapattardy Qazaqstan halqy Asambleıasy tóraǵasynyń orynbasary Lıýbov Nı tabys etti.
Medaldarmen jáne qurmet gramotalarymen marapattalǵan azamattardyń ishinde QR halyq ártisi, ánshi, kompozıtr Eskendir Hasanǵalıev, QR halyq ártisi, ánshi Nurǵalı Núsipjanov, otandyq estrada juldyzdary Tolqyn Zabırova men Medeý Arynbaev, sondaı-aq, «QazAqparat» HAA Almatydaǵy tilshiler bıýrosynyń jetekshisi Sara Mustafına jáne basqa da azamattar bar.
«Men eńbegimniń baǵalanǵanyna qýanyshtymyn. Áriptesterimniń barlyǵyn quttyqtaımyn! Bıyl shynynda da erekshe jyl boldy. Biz Uly Jeńistiń 70 jyldyǵyn, Qazaqstan Konstıtýtsııasynyń 20 jyldyǵyn, Qazaq handyǵynyń 550 jyldyǵyn jáne Qazaqstan halqy Assambleıasynyń 20 jyldyǵyn atap óttik. Barlyq otandastarymdy kirip kele jatqan Jańa jylmen quttyqtaımyn! Elimizde beıbitshilik pen ultaralyq kelisim saltanat qursyn!, - dedi QR eńbek sińirgen ártisi Medeý Arynbaev.
