Almatyda kezinde laýreat atanǵan, keıinnen kórinbeı ketken ónerpazdardyń kontserti ótti

Onyń alǵashqy sharasy ár jyldary túrli deńgeıdegi baıqaýlarda laýreat bolǵanymen esimderi kópshilikke onsha tanyla qoımaǵan ónerpazdardyń tuńǵysh kontsertin ótkizýge arnaldy, dep habarlaıdy QazAqparat.

"Bizdiń ózindik ereksheligimiz men baǵyt-baǵdarymyz bar. Basty maqsatymyz - ár jyldary túrli respýblıkalyq jáne halyqaralyq baıqaýlarda laýreat bolǵanymen, keıin kórinbeı tasada qalyp qoıǵan ónerpazdardy halyqtyń esine túsirý. Kókeıimde kópten júrgen bul oıdyń aldymen televızııalyq jobasyn jasadym. Alaıda ony telearnalardyń eshqaısysyna ótkize almadym. Sondyqtan kontserttik jobasyn ázirlep, ony qalalyq mádenıet basqarmasynyń qoldaýymen sátti júzege asyrdyq", deıdi "Laýreat" prodıýserlik ortalyǵynyń jetekshisi, Qazaqstanyń mádenıet qaıratkeri Maqsat Tilepbergen.

Jylyna 2 ret ótedi dep josparlanyp otyrǵan bul kontserttiń ózgelerden birneshe basty ereksheligi bar. Birinshi, onda eshqandaı fonogramma bolmaıdy. Ekinshi, ataǵy bar óner ıeleri qatyspaıdy. Sondaı-aq opera, estrada jáne dástúrli án, jyr, terme, kúı óneriniń sheberleri ǵana emes, qobyzshy, skrıpkashy, baıanshy, pıanıst degen sııaqty aspaptarda oryndaýshylar da qatysady. Bolashaqta olardyń qataryna bıshiler de qosylmaq. Úshinshi, árbir kontsertte onyń quramy ózgerip otyrady.

"Jandy daýys, tiri daýys degen sózderdi kim shyǵarǵanyn bilmeımin. Bul qazaqta joq túsinik. Qazaq daýysy bar, daýysy joq deıdi. Al qandaı da bir baıqaýǵa qatysyp, onda laýreat ataný ónerpazdyń ónerde óz ornymdy alam dep kelgenin bildiredi. Biz olar týraly málimetti Ortalyq muraǵattan alamyz. Birinshi kezekte ilgeride shyqqan jáne aýylda júrgen laýreattarmen jumys isteımiz. Olar aımaqtarǵa shyqqan kezde kontsertke qosylady. Bolashaqta jas ónerpazdardyń arasynan bir úmitkerdi - halyqaralyq, al ekinshisin respýblıkalyq baıqaýǵa daıyndap, qatystyrý týraly jospar da bar", deıdi Maqsat Tilepbergen.