Almatyda kezekti velosherý ótti
ASTANA. QazAqparat - Búgin Almatyda ótken kezekti velosherýge 3 myńnan astam adam qatysty. Qalalyq dene shynyqtyrý jáne sport basqarmasynan málim etkendeı, bul jolǵy sherý Otan qorǵaýshy kúni men Jeńis merekesine arnaldy, dep habarlaıdy QazAqparat.
Ádettegideı, áýesqoılar saǵat 08:30-da «Nurly Taý» mańynda jınalyp, baǵaly syılyqtar oınatylatyn lotereıaǵa qatysý úshin bastapqy nómirlerin aldy. Keıin qala kóshelerimen 12 shaqyrym júrip ótti.
Respýblıka saraıy mańynda márege jetkennen keıin sport súıer qaýym men mereke qonaqtary Almaty qalasynyń dene shynyqtyrý jáne sport basqarmasynyń, sondaı-aq Qazaqstandaǵy KFC brend ókilderiniń UOS ardagerlerin quttyqtaý rásimin tamashalady. Sonymen qatar, Uly jeńis merekesine oraı ardagerlerge qurmet kórsetilip, baǵaly syılyqtar tabys etildi.
Ardagerlermen birge syılyqtarǵa velosherý qatysýshylary da ıe boldy. Osylaısha, baǵaly syılyqtardyń biri - velosıpedti Murat Sadyqov jeńip aldy.
Keıin osy alańda merekelik kontsert pen oıyn-saýyq shoý-baǵdarlamalar, strıtboldan jarystar ótti. Sondaı-aq arnaıy shaqyrylǵan qonaq, reseılik reper L'One óner kórsetti.
Eske sala ketsek, atalmysh sporttyq shara «Sporttyq Almaty» jobasy aıasynda bıyl ótkizý josparlanǵan 20 velosherýdiń úshinshisi. Baǵdarlama megapolıste buqaralyq sporttyń damýyna, belsendi demalysty nasıhattaýǵa baǵyttalǵan.
