Almatyda kezekti narkoprıton joıyldy
ALMATY. Sáýirdiń 13-i. QazAqparat /Názıra Eleýhan/ - Almaty polıtseıleri kezekti narkoprıton oshaǵyn anyqtap, joıdy,
dep habarlaıdy QazAqparat.
Bul oryn esirtkige táýeldi Kishi stanıtsa turǵynynyń úıinde ornalasqan bolyp shyqty. Úı ıesi esirtki tutynýshylardy onymen qamtamasyz etip ǵane qoımaı, esirtki qoldaný ornyn da usynǵan. «Ol adam týraly bizge ótken aptada málim boldy. Biz arnaıy jospar quryp, úıinde tórt «qonaq» geroın qoldanyp otyrǵan kezinde quryqtadyq. Jiti qarý barysynda ol úıden qoldanylǵan shprıtster, penıtsılın men ledokoıny bar ampýlalar, geroın tabyldy. Ustalǵandardyń barlyǵy esirtkiniń áserinde bolǵandyqtan, suraǵymyzdyń birine de jaýap bere almady. Ustaý sharasy kýágerlerdiń qatysýymen ótkizildi», dedi Almaty qalasy ІІD-niń esirtki saýdasymen kúres basqarmasynyń bastyǵy, polıtsııa maıory Denıs Loskýtov. Onyń aıtýynsha, ustalǵan adam uzaq ýaqyt boıy esirtki satýmen aınalysqanyn jasyrmaǵan.
«Onyń ómirbaıany qylmystyq oqıǵaǵa toly. Jaqynda ǵana ol kisi tonaǵany úshin bas bostandyǵynan aıyrylǵan jerinen erkindikke shyqqan bolatyn. Oǵan endi QR Qylmystyq kodeksiniń eki baby boıynsha - esirtki quraldaryn tutyný jáne narkoprıton ustap, ony uıymdastyrǵany úshin aıyby taǵylady», dep atap ótti D.Loskýtov.
Jyldyń basynan bergi bul Almatyda anyqtalǵan ekinshi narkoprıton.
