Almatyda «kezekshi» halyqqa qyzmet kórsetý ortalyǵy ashyldy

ALMATY. QazAqparat – Almatylyqtar halyqqa qyzmet kórsetý ortalyqtarynan qyzmet alýǵa úlgermeı qalatyndaryn aıtyp shaǵymdanýda. Osyǵan oraı, qyzmet alýshylardyń talap-tilekterin eskere otyryp, Almatyda «kezekshi HQO» ashyldy, dep habarlaıdy QazAqparat tilshisi.

«Saǵat 09:00-den 18:00-ge deıingi aralyqta qyzmet alyp úlgermegen azamattar, Almaty qalasy, Bógenbaı batyr kóshesi, 221 mekenjaıynda ornalasqan Almaly aýdandyq HQO-ǵa júgine alady. Qujattandyrýdan basqa barlyq qyzmetter saǵat 20.00-ge deıin kórsetiledi. Al, avtokólik ıeleri úshin Túrksib aýdany, Qulja tasjoly, 9 km. «Kerýen» toıhanasy ǵımaratynda ornalasqan Halyqqa qyzmet kórsetý boıynsha mamandandyrylǵan №5 bólimi 2 saǵatqa uzaǵyraq jumys isteıdi», - dep habarlady «Azamattarǵa arnalǵan úkimet» memlekettik korporatsııasy Almaty qalasy fılıalynda.

Sondaı-aq, fılıalda memlekettik qyzmetterdiń 90 paıyzyn elektrondy túrde alýǵa bolatynyn eske saldy.

Aıta keteıik, «Azamattarǵa arnalǵan úkimet» memlekettik korporatsııasy Almaty qalasy fılıalynyń front-ofısteri: dúısenbi – juma kúnderi saǵat 09:00-18:00 aralyǵynda jumys isteıdi.