Almatyda keıýanalardy aldap, tonap ketken alaıaq ustaldy
ALMATY. QazAqparat - Almaty polıtsııasy megapolıste keıýanalardy tonap júrgen alaıaqty ustady, dep habarlaıdy QazAqparat tilshisi.
Almaty polıtsııasynyń deregine sáıkes, ustalǵan kúdikti burynda alaıaqtyq jasaǵany úshin sottalǵan. 1965 jyly týǵan B-ny baqylaý kameralary arqyly anyqtady. Kúdikti qurbandaryn óziniń sybaılastarymen birge tańdaǵan. Kóbine bankter men bankomattardan shyqqan qart ájeılerdi aldap, aqshalaryn qoldy etken.
«Olar 90-jyldardaǵy eski alaıaqtyq tásildi qoldanǵan. Olar jerden ámııan taýyp alady, onyń kýágeri jáne jábirlenýshisi ótip bara jatqan adam bolady. Bul kelesi shema boıynsha jasalady: olardyń bireýi jerde jatqan ámııandy taýyp alyp, ótip bara jatqan kýágerden suraıdy. «Ámııan sizdiki emes pe? Kimnen túsip qalǵanyn baıqamadyńyz ba?» degen sııaqty suraqtar qoıady. Árıne, ol kezde jábirlenýshi bul alaıaqtardyń josparly isi ekenin bilmeıdi. Alaıaq kýágerge ámııandy birge ashyp kórýdi usynady. Sol kezde ámııannyń ıesi kelip, ishindegi aqshasynyń joqtyǵyn aıtyp, qaıtarýdy talap etedi. Taýyp alǵan alaıaq jalany birden kýágerge jabady. Sóıtip, jábirlenýshige qaltasyndaǵy barlyq aqshany shyǵarýdy talap etedi, osylaısha alaıaqtar apalardyń aqshasyn ońaı jolmen alyp otyrǵan», - deıdi Almaly aýdandyq polıtsııa basqarmasy bastyǵynyń mindetin atqarýshy Abzal Turǵanáli.
Qylmyskerler mundaı «kórinisti» sengish adamdarǵa qoldanǵan. Sondyqtan olar tek ájelerdi tańdaǵan.
«Ekinshi kúdiktige keler bolsaq, onyń jeke basy anyqtaldy. Jaqyn kúnderi ustalady. Ol da, sybaılasy sııaqty QRQK 190-babymen alaıaqtyq úshin jaýapqa tartylatyn bolady. Qazirgi ýaqytta ustalǵan 54 jastaǵy B. Almaty qalalyq PD ýaqytsha ustaý ızolıatoryna qamaldy. Onyń megapolıs aýmaǵynda osyǵan uqsas basqa qylmystarǵa qatysynyń bar-joǵy tekserilýde», - dedi Abzal Turǵanáli.
