Almatyda keste buıymdary kórmesi ashyldy
ALMATY. Maýsymnyń 23-i. QazAqparat /Erbol Turymbetov/ - Búgin Almatydaǵy Memlekettik ortalyq murajaıda «Murajaı qoryndaǵy keste buıymdary» atty kórme ashyldy,
dep habarlaıdy QazAqparat.
Kórmeni murajaı qyzmetkerleri uıymdastyryp otyr. Sharanyń maqsaty halyqtyq qolóner buıymdaryn nasıhattaý men elimizde turyp jatqan ár túrli ulttardyń qolónerin qaıta jańǵyrtýǵa baǵyttalǵan.
Keste halyqtyq-qoldanbaly ónerdiń kópshilikke málim jáne erekshe dástúrli túri bolyp tabylady. Onyń paıda bolýy alǵashqy qaýymdyq qurylys mádenıetine jatatyn ań terisinen tigilgen kıimniń jasalýymen baılanysty.
«Keste tigý uqyptylyq pen tózimdilikti qajet etetin qıyn óner. Onda ár halyqtyń kórkemdik talǵamy, ulttyq ózgesheligi men sheberligi jatyr. Biz búgingi kórmege keste óneriniń ozyq úlgilerin qoıyp otyrmyz. Bul kórme kórermenderge qolóner sheberleriniń qajyrly eńbegin kórsete alady degen senimdemin», dedi ashylý saltanatynda sóılegen murajaıdyń qor saqtaý tobynyń jetekshisi Álııa Rahmanqulova.
Kórmege qazaqtar men Qazaqstanda turatyn ózge halyqtardyń HІH ǵasyrdyń sońy men HH ǵasyrdaǵy keste buıymdary qoıylǵan. Onda qazaqtardyń qolmen kestelengen shapandary, kımeshekteri, beshpentteri men dastarhandary jáne kıiz úı jasaýlary bar. Sonymen qatar, munda alǵash ret QR MOM qoryndaǵy orys, tatar, dúngen, mordva jáne basqa da halyqtardyń keste óneriniń aıryqsha úlgileri kórsetilýde. Uıymdastyrýshylardyń aıtýynsha, kórme qyrkúıek aıyna deıin jalǵasady dep josparlanǵan.
