Almatyda keshe koronavırýstan qaıtys bolǵan eki adam aýrýhanaǵa aýyr halde túsken
ALMATY. QazAqparat – Qalanyń qoǵamdyq densaýlyq saqtaý basqarmasy 21 maýsym kúni koronavırýstan qaıtys bolǵan eki adam týraly aıtyp berdi, dep habarlaıdy QazAqparat tilshisi.
«1960 jyly týǵan er adam 5 maýsymda ınfektsııalyq statsıonarǵa jatqyzyldy. Aýrýhanaǵa túskende eki jaqty polısegmentarly pnevmonııa bolǵandyqtan jaǵdaıy aýyr bolatyn. Birden ókpeni jasandy jeldetý apparatyna qosyldy. Dıagnostıka jáne emdeý hattamasyna sáıkes emdeldi. Soǵan qaramastan júregi toqtap qaldy. Dárigerler oǵan 30 mınýt boıy reanımatsııalyq sharalar jasady, ókinishke qaraı qaıtys boldy», - dep habarlady qoǵamdyq densaýlyq saqtaý basqarmasy.
Kóz jumǵan ekinshi adam 63 jasta bolǵan. Maýsymnyń basynda JRVI belgilerimen aýyrǵan. Úıde ózdiginen emdelgen. 14 maýsymda jedel járdem kóligimen ınfektsııalyq statsıonarǵa jetkizilip birden jatqyzyldy.
«Sol kezde koronavırýs ınfektsııasynyń taldaýy oń nátıje kórsetken. Basqa da syrqaty bolǵan. Birneshe jyldan beri sozylmaly júrektiń ıshemııalyq aýrýy, arterıaldy gıpertenzııamen aýyrǵan. Vıremııa belsendi bolǵandyqtan , aýyr mýltımorbıd saldary polıaǵzalyq sındromyna ákep soqty jáne sodan qaıtys boldy», - dep qosty vedomstvodaǵylar.
Komıssııa eki adamda SARS-COV-2 saldarynan ekijaqty pnevmonııa bolyp, qaıtys boldy degen sheshim shyǵardy.
Almatyda jalpy koronavırýstan qaıtys bolǵandar sany 20-ǵa jetti.
