Almatyda kepterler neden qyryldy – sarapshylar
ALMATY. QazAqparat – QR Aýyl sharýashylyǵy mınıstrliginiń Veterınarlyq baqylaý komıtetiniń «Veterınarııa boıynsha Ulttyq referenttik ortalyq» RMK Almatydaǵy kepterlerdiń jappaı qyrylýyna qatysty túsinik berdi, dep habarlaıdy QazAqparat tilshisi.
Oqıǵa 28 Panfılovshylar parkinde bolǵan edi. 26 naýryzda 20 shaqty kepter park terrıtorııasynda qyrylyp qalǵan. Turǵyndar olardyń dezınfektsııalyq quraldardan ólgenin tuspaldady. Ulttyq referenttik ortalyq mamandary olardyń ólimine qatysty qorytyndy shyǵardy.
«Qus tumaýy, Nıýkasl indeti, orbıtoz, hlamıdıoz, pasterıoz sııaqty ınfektsııalyq aýrýlar joq ekendigi anyqtaldy. Qustardyń aǵzasynan aýyr metall tuzdary, hlor tabylmady. Olardyń asqazany bos bolyp shyqty», - dedi ortalyq mamandary.
Qustardyń hımııalyq ýlanýy joqqa shyǵarylsa da merdigerlik uıymdardaǵy dezınfektsııalyq quraldardyń quramy taǵy tekserildi.
Barlyq dezınfektsııalyq quraldary standartqa saı ekendigi, adam men janýarlar aǵzasyna zalaly joqtyǵy anyqtaldy.
QR Ekologııa, geologııa jáne tabıǵı resýrstar mınıstrliginiń Orman sharýashylyǵy jáne janýarlar álemi komıtetiniń baspasóz hatshysy Sáken Dildahmet qustardyń ólimin zertteý úshin arnaıy komıssııa qurylǵanyn aıtqan edi.
Almaty ákimdigi aýlalardy dezınfektsııalaýǵa arnalǵan quraldardyń adam aǵzasyna qaýipsizdigin aıtqan edi.
«Almaty qalasy boıynsha dezınfektsııalaý ortalyǵy» RMK bólimshesiniń aqparatyna sáıkes, zamanaýı dezınfektsııalyq quraldar 4-sanattaǵy quraldarǵa jatady. ıAǵnı, adam aǵzasyna qaýipi tómen bolǵandyqtan, adam aǵzasyna, janýarlardyń aǵzasyna zııan keltirmeıdi. Arnaıy eritindi mamandardyń ınstrýktsııasyna sáıkes ázirlenedi. Aýlalardy zararsyzdandyrýǵa memlekettik reestrge kiretin Keden odaǵy nemese Qazaqstan terrıtorııasyna qoldanýǵa ruqsat etilgen quraldar qoldanylady. Trotýarlardy, aıaldama keshenderin, qoqys jáshikterin, bankomattardy dezınfektsııalaý úshin QR Qorǵanys mınıstrliginiń áskerı dezotrıadtary belsendi hlor boıynsha 0,015% kontsentratsııadaǵy natrıı gıpohlorıdin paıdalanady», - dedi ákimdikten.
