Almatyda Kenjeǵalı Saǵadıevtiń aǵylshyn tilindegi kitaby tanystyryldy
«Reforms in Kazakhstan: An analytical View» atty kitaptyń avtory - Qazaqstannyń belgili memleket jáne qoǵam qaıratkeri, joǵary mektep pen ǵylym isiniń kórnekti uıymdastyrýshysy, ekonomıst ǵalym Kenjeǵalı Ábenuly Saǵadıev.
Іs-sharaǵa memlekettik organdardyń, ǵylymı jáne shyǵarmashylyq qoǵamdastyqtyń, bıznes ortanyń ókilderi, joǵary oqý oryndarynyń rektorlary, sonymen qatar professorlyq-oqytýshylyq quram jáne elimizdiń stýdentter qaýymy qatysty.
Memlekettik hatshy quttyqtaý sózinde Elbasy Nursultan Nazarbaevtyń strategııalyq baǵdarynyń mańyzdy basymdyǵynyń biri - otandyq ǵylymdy damytý ekenin atap ótti. Memleket basshysy búkil Táýelsizdik dáýiri boıy ǵylymǵa jáne ǵalymdarǵa árdaıym qamqorlyq jasap, eldegi akademııalyq jáne qoldanbaly zertteýlerge jan-jaqty qoldaý kórsetip keledi.
Táýelsizdik jyldary ǵylymı qyzmetti basqarýdyń jańa modeli, ǵylymdy qarjylandyrýdyń zamanaýı tetikteri engizildi. Máselen, 2016 jyly 23 myń ǵalym jáne 383 mekeme ǵylymı zertteý jumystarymen aınalysty. Jalpy, bul salaǵa 38 mıllıard teńge jumsalǵan.
Gúlshara Ábdiqalyqova bul monografııa táýelsizdik jyldaryndaǵy Qazaqstan ekonomıkasyndaǵy mańyzdy máselelerdi taldaýǵa arnalǵanyn, sondaı-aq onda qoǵamymyzdy damytýdyń túrli aspektilerine qatysty avtordyń pikiri berilgenin atap ótti. Bul eńbek Memleket basshysy usynǵan ári búkil álem úshin hrestomatııaǵa aınalǵan Qazaqstan jolyn oı eleginen ótkizýge arnalǵan.
Kitap tek bizdiń elde ǵana emes, shet elderde de keńinen talqylanyp, laıyqty baǵasyn aldy. Máselen, Kembrıdj ýnıversıtetiniń professory Sıdhart Saksen bul eńbektiń postkeńestik keńistiktegi reformalar jóninde nusqaýlyqqa aınalǵanyn atap ótken. Al Máskeý memlekettik ýnıversıtetiniń professory Aleksandr Býzgalınniń oıynsha, bul basylym - barlyq memleketter óz táýelsizdiginiń bastapqy jyldarynda tap bolǵan jahandyq syn-qaterlerdi eńserý erejeleriniń ózindik bir jıyntyǵy.
Іs-shara sońynda Memlekettik hatshy G.N.Ábdiqalyqova akademık K.Á.Saǵadıevke myqty densaýlyq, baq-bereke, jańa shyǵarmashylyq tabystar tiledi.
