Almatyda keńseden 105 mıllıon teńgesi bar seıf urlandy
ALMATY. QazAqparat – Almatyda fırmalardyń biriniń keńsesinen 105 mıllıon teńgesi bar seıf urlandy, dep habarlaıdy QazAqparat tilshisi.
Qazirgi ýaqytta kúdiktiler anyqtalyp, qamaýǵa alyndy.
«Qylmys 31 tamyzǵa qaraǵan túni boldy. Rysqulov dańǵylynda ornalasqan qalalyq fırmalardyń biriniń keńsesinen bireýler 105 mıllıon teńge salynǵan seıfti urlap ketken. Qylmysty ashý maqsatynda arnaıy jedel-tergeý toby quryldy. Kompanııalardyń beınebaqylaý kameralaryndaǵy derekter zertteldi. Qylmyskerler betterin muqııat jasyrǵan. Biraq, jedel is-shara nátıjesinde kúdiktilerdiń ekeýi de anyqtalyp, qamaýǵa alyndy. Bul 1992 jáne 1993 jyly týǵan jergilikti turǵyndar. Buǵan deıin olar múliktik qylmys jasaǵany úshin jaýapqa tartylǵan. Aıǵaqty zattar, sonyń ishinde urlanǵan aqshalar is júrgizý tártibinde ıesine qaıtaryldy», – dedi Almaty qalalyq Polıtsııa departamenti krımınaldyq polıtsııa basqarmasynyń bastyǵy Erkin Іńkárov.
Fırmanyń basshysy Vıtalıı Kım polıtsııa qyzmetkerlerine osy qylmystyń jedel ashylǵany úshin rızashylyǵyn bildirdi.
«Polıtsııa qyzmetkerlerine osy qylmysty tez arada ashqany úshin alǵys aıtqym keledi. Bul biz úshin mańyzdy: biz úsh aǵaıyndymyz, Reseıden qurylys materıaldaryn jetkizý boıynsha birlesken kásip júrgizemiz», – dedi ol.
