Almatyda keńse alaıaǵy ustaldy
ALMATY.QazAqparat - Almatyda keńseler men ondaǵy qyzmetkerlerdiń múlkin qoldy etip kelgen alaıaq ustaldy. Bul týraly qalalyq Polıtsııa departamentiniń baspasóz qyzmetinen málim etti, dep habarlaıdy QazAqparat tilshisi.
Almaty qalalyq PD aqparatyna sáıkes, azamat B.-ǵa qatysty alaıaqtyq faktisi boıynsha is qozǵaldy. Kúdikti senimge kirý arqyly jekemenshik kásiporyndardyń keńse qyzmetkerleriniń múlkin urlap kelgen.
«Ol óziniń adamdardy sendirý ádisteri is júzinde jaqsy jumys isteıtinin bilgen. Kúdikti kompanııa keńseleriniń birine keshki ýaqytta kirip otyrǵan. Úıine qaıtýǵa daıyndalyp jatqan jábirlenýshilerdi áńgimege tartyp, óziniń hıkaıalaryn aıtyp, tonap otyrǵan. Ury bir keńseden 150 myń teńge turatyn qymbat proektordy, 250 myń teńgelik kamerany, quny 140 myń teńgeni quraıtyn «Sony Playstation 4» oıyn quralyn jáne 40 myń teńgelik «Samsung» teledıdaryn urlap ketken. Satylǵan taýardyń aqshasy oǵan eki aıǵa jetken. Qarjysy bitkende jańa qylmys jasap otyrǵan. Sondaı-aq kúdikti «Taýgúl» yqshamaýdanynda 200 myń teńgelik vıdeoproektordy qoldy etken. Ol Almatydan ketip qalǵan, biraq bizdiń qyzmetkerlerimiz ony Nur-Sultan qalasynan ustady», - deıdi Áýezov aýdandyq polıtsııa bóliminiń bastyǵy Jasulan Turyspaev.
Tergeý málimetteri boıynsha, aldanǵandar kóp bolýy múmkin, osyǵan baılanysty azamat B.-nyń basqa da qylmystarǵa qatysy bar-joǵy muqııat tekserilip jatyr. Kúdiktiden zardap shekkender polıtsııa qyzmetkerlerine habarlasa alady.
