Almatyda Kenesary han týraly derekti fılmniń túsirilimi bastaldy
ALMATY. 6 sáýir. QazAqparat /Názıra Eleýhan/ - Almatyda «Kenesary» qoǵamdyq qory men rejısser Marat Qońyrov 5 sáýirden bastap qysqa metrajdy «Kenesary han» derekti fılmin túsirýge kiristi.
«Daıyndyq jumystary bıylǵy jyldyń 28 aqpanynda bastaldy. Túsirilimder Almaty qalasynyń aýmaǵynda, Qaskelen jáne Medeý muz aıdyny mańynda ótetin bolady. Kenesary hannyń rólin Erlan Musataı somdasa, al onyń qaryndasy Bopaı rólin Londonda turatyn Aıǵa Jámil oınaıtyn bolady. Fılmdi túsirý sáýir aıynyń aıaǵyna deıin jalǵasady. Premerany bıylǵy jyldyń jazynda qoıýdy josparlap otyrmyz»,-dedi derekti fılmniń rejısseri M.Qońyrov.
Kene han - Kenesary Qasymuly (1802-1847) - qazaqtyń eń sońǵy hany, Abylaı hannyń nemeresi. Qazaq halqynyń patshalyq Reseıge, Qoqan jáne Hıýa handyqtaryna qarsy júrgizgen ult-azattyq kúresin basqarýshy.1841 jyly úsh júzdiń rýlyq keńesinde Kenesary Qasymuly han bolyp saılanady.
Kenesary han qazaq halqynyń salt-dástúrin saqtaı otyryp, halyqty bostandyq pen táýelsizdik jolyndaǵy kúreske jumyldyra bildi, onyń saıasaty men ıdeologııasy ulttyń damý jolyndaǵy ózekti máselelerdi sheshýge baǵyttaldy. Kenesary Qasymuly «memleket táýelsizdiginiń» óte mańyzdy is ekenin halyq sanasyna quıýda qyrýar eńbekter atqardy. Ol Qazaqstannyń táýelsizdikke qol jetkizý jolyndaǵy kúrestiń basynda turǵan tulǵalardyń biri.
