Almatyda Keńes Odaǵynyń Batyry Vasılıı Benberın turǵan úıge eskertkish taqta ornatyldy (FOTO)
«Búgingi shara memlekettiń ardagerlerge degen qamqorlyǵynyń aıqyn kórinisi. Meniń ákem qazaq dalasynda týdy. Soǵystan keıin týǵan jerge oraldy. Kóptegen jaraqattaryna qaramastan, talaı jyl eńbek etti. Ol bizdi adamgershilikke,baýyrmaldyqqa baýlydy. Al batyrlardyń esimin máńgilikke este saqtaý sharasy - elimizde patrıotızmniń nyǵaıa túsýine septigin tıgizedi» - dedi batyrdyń uly Valerıı Benberın.
Onyń aıtýynsha, ákesi 44-shi gvardııalyq tank brıgadasynyń barlaýshy tankiniń komandıri bolǵan eken. KSRO Joǵarǵy Keńesi Tóralqasynyń 1945 jyldyń 27 aqpanyndaǵy Qaýlysyna sáıkes, gvardııalyq kishi leıtenant Vasılıı Benberınge nemis basqynshylarymen kúreste kórsetken erligi úshin Keńes Odaǵynyń Batyry ataǵy berilip, Lenın jáne «Altyn juldyz» medalimen marapattalǵan.
«Ákem alty jaraqat alǵan. Oder ózeninen óterde qolynan aıyryldy. Janyp jatqan tankten sekirip túsip bara jatqan sátte tıgen mergen oǵy qolyna tıgen. Ol Berlınge 60 shaqyrym jete almaı qaldy. Jeńisti gospıtalda jatyp qarsy aldy. Úıge 1947 jyly oraldy» - dedi V. Benberın.
Onyń aıtýynsha, ákesi óziniń dál qaı kúni týǵanyn bilmepti. Al atasynyń aıtýynsha shamamen mamyr aıynda týǵan kórinedi. Soǵystan aman oralǵan soń ákesi týǵan kúnin jyl saıyn 9 mamyrda atap ótetin bolǵan. Tiri bolǵanda bıyl 97 jasqa tolatyn edi.
