Almatyda Keńes odaǵy kezinen beri turǵyn úı kezeginde turǵan 14 400 adam bar

Bul týraly búgin qalalyq Turǵyn úı basqarmasynyń bastyǵy Qaırat Nurqadilov aıtty.

«Bul azamattar jyl saıyn kezeginiń jetýine qaraı páter alyp jatyr. Bul kezektegi azamattarǵa jylyna 250-300 páter beriledi. Qazir tegin dúnıe joq. Sondyqtan kezegi jetken azamattarǵa úıler jalǵa beriledi. Jaldaý quny 1 bólme úshin 2400 teńge jáne kommýnaldyq qyzmet aqysy, 3 bólmeli páter úshin 3500 teńge men kommýnaldyq qyzmet aqysyn tóleıdi»,- dedi Q.Nurqadilov.

Onyń sózine qaraǵanda, qalada tegin baspanaǵa tek UOS-y, Aýǵan soǵysy ardagerleri, 1,2 top múgedekteri, Chernobl apatyn joıýǵa qatysýshylar, Aral men Semeı polıgony mańynyń turǵyndary qol jetkize alady. «Bul rette Almatyda turatyn Uly Otan soǵysy ardagerlerin pátermen qamtýdy 2 ret aıaqtaǵan bolatyn. Alaıda, qalaǵa kóship keletin ardagerler esebinen sońǵy 5 jylda 110 ardager kezekke turdy. Byltyrǵy jyly 101 ardagerge páter berildi. Endi kezekke taǵy 40 ardager turdy», deıdi Q.Nurqadilov.