Almatyda «Keńes elderiniń óneri» kórmesi ashyldy (FOTO)
ALMATY. QazAqparat - Búgin Almatyda Á. Qasteev atyndaǵy QR Memlekettik óner mýzeıiniń ortalyq kórme zalynda «Keńes elderiniń óneri» atty kórme ashyldy.
«Keńes zamany kelmeske ketti. Biraq, óner qaldy ǵoı. Árıne, sýretshiler sotsıalıstik realızm sheńberinde eńbek etti. Sotsrealızm aıasynda Ortalyq Azııa men Kavkaz elderinde ulttyq keskindeme óneri damydy. Muny joqqa shyǵarýǵa bolmaıdy. Bul týyndylardan sýretshilerdiń naǵyz sheber ekendikterin baıqaımyz.
Olar jarqyn bolashaqqa sene otyryp, sol kezeńdegi ahýaldy dál bere bilýge tyrysqan. Bul kartınalar qazir de kórkemdik jáne kommertsııalyq qundylyqqa ıe», - dedi óz sózinde Á. Qasteev atyndaǵy memlekettik óner murajaıynyń ǵylymı saraptama ortalyǵynyń jetekshisi Kamılla Lı.
Búgingi kórmege «Qara gıýrlá», ıaǵnı túrik tilinen aýdarǵanda - «Qara naızaǵaı» dep atalatyn almatylyq jeke antıkvarlyq salonnyń 70-ten astam kartınasy men ondaǵan óte sırek kezdesetin antıkvarlyq buıymdary qoıyldy.
Salonnyń ıesi Hamzat Qaragıýrlá bul toptamany 20 jylǵa jýyq ýaqyt jınapty. Qazir, onyń toptamasynda keńes zamanyna qatysty 700-den astam kartına bar.
Kórmege KSRO-nyń burynǵy odaqtas respýblıkalary - Qazaq KSR-i, Qyrǵyz KSR-i, Ózbek KSR-i, Kúngeı Kavkaz respýblıkalary - Grýzın KSR-i men Armıan KSR-iniń sotsıalızm dáýirindegi týyndylary usynyldy. Olardyń ishinde Qazaq KSR Eńbek sińirgen óner qaıratkerleri - Toqbolat Toǵyzbaev pen Borıs Paktyń, Qazaq KSR halyq sýretshisi Naǵymbek Nurmuhammedovtiń, KSRO Sýretshiler odaǵynyń músheleri Hamza Qıqymov pen Valentın Tkachenkonyń, Qyrǵyzstannan - Qyrǵyz beıneleý óneriniń negizin salǵan KSRO Halyq sýretshisi Sergeı Chýıkovtyń, Eńbek sińirgen mádenıet qaıratkeri Vıktor Tıýrınniń, Ózbekstannyń dańqty sýretshileri - Petr Mordvıntsevtiń, Nyǵmat Kúzibaevtyń, R. Ahmedovtiń, Grýzııanyń belgili sheberleri R. Tordııanyń, Mıhaıl Hvıtııanyń jáne basqa da sýretshilerdiń jumystary bar.
Kórme 15 sáýirge deıin jumys isteıdi. 
