Almatyda «Keńes elderiniń óneri» kórmesi ashylady (FOTO)
ALMATY. QazAqparat- Almatyda 29 naýryzda Á. Qasteev atyndaǵy QR Memlekettik óner mýzeıinde «Keńes elderiniń óneri» atty kórme ashylady.
«2017 jyly Qazan tóńkerisine júz jyl tolady. Jyl ótken saıyn bul dáýir artta qalyp barady, biraq onyń saıası-áleýmettik, mádenıettanýshylyq, fılosofııalyq quny áli de óz baǵasyn alǵan joq. Osyǵan baılanysty, «Kara Gıýrla» antıkvarlyq salony KSRO-nyń burynǵy odaqtas respýblıkalary - Qazaq KSR-i, Qyrǵyz KSR-i, Ózbek KSR-i, Kúngeı Kavkaz respýblıkalary - Grýzın KSR-i men Armıan KSR-iniń sotsıalızm dáýirindegi týyndylarynyń kórmesin, dál keńes kezeńinde qalyptasqan ulttyq beıneleý óneri mektepterin usynady», - dep habarlaıdy Á. Qasteev atyndaǵy QR Memlekettik óner mýzeıiniń baspasóz qyzmeti.
Shyǵarmashylyq tásildiń jalpy resmıligine qaramastan, árbir ulttyq mektep ǵasyrlar boıy dúnıetanymdyq jáne estetıkalyq dástúrlermen shyńdalǵan ulttyq mádenıetke baılanysty óz stılin, óziniń kórkem-beınelik júıesin jasap shyǵarǵany belgili.
Kórmede Qazaqstannyń kórkemdik mektebin Qazaq KSR eńbek sińirgen óner qaıratkerleri Toqbolat Toǵyzbaev pen Borıs Paktyń, Qazaq KSR halyq sýretshisi Naǵymbek Nurmuhammedovtiń, KSRO Sýretshiler odaǵynyń músheleri Hamza Qıqymov pen Valentın Tkachenkonyń, Qyrǵyzstannan - Qyrǵyz beıneleý óneriniń negizin salǵan KSRO halyq sýretshisi Sergeı Chýıkovtyń, Eńbek sińirgen mádenıet qaıratkeri Vıktor Tıýrınniń, Ózbekstannyń dańqty sýretshileri - Petr Mordvıntsevtiń, Nyǵmat Kúzibaevtyń, R. Ahmedovtiń, Grýzııanyń belgili sheberleri R. Tordııanyń, Mıhaıl Hvıtııanyń jáne basqa da sýretshilerdiń jumystary kórsetiledi.
Kórme 29 naýryzda saǵat 17:00-de ashylady.
