Almatyda Kenen Ázirbaevtyń 125 jyldyǵyna arnalǵan kontserttik kesh ótti
ALMATY. Jeltoqsannyń 1-i. QazAqparat /Názıra Eleýhan/ - M.Áýezov atyndaǵy Qazaq akademııalyq teatrynda Qazaq KSR-ine eńbek sińirgen óner qaıratkeri, Qazaq KSR-iniń halyq aqyny, KSRO Jazýshylar odaǵy men Kompozıtorlar odaǵynyń múshesi, Jambyldyń shákirti, ári izbasary, ánshi, ári jyrshy Kenen Ázirbaevtyń 125 jyldyǵyna arnalǵan kontserttik kesh ótti,
dep habarlaıdy QazAqparat.
Keshte Kenen atanyń batasyn alǵan aqyndar, jazýshylar, murasyn jalǵastyrýshy aqyn-jyrshylar sóz sóılep, Kenen Ázirbaevty eske aldy. Kontserttik baǵdarlamada Kenen Ázirbaev atyndaǵy respýblıkalyq baıqaýlardyń jeńimpazdary, elimizdiń estrada juldyzdary, Qyrǵyz elinen kelgen ánshiler Kenen Ázirbaevtyń shyǵarǵan ánderin oryndap, toıǵa ánmen shashý shashty. Myń buralǵan bıshiler keshtiń kórkin asha tústi. Keshte Kenen Ázirbaevtyń 12 jasynda shyǵarǵan «Boztorǵaı» ánimen qatar, «Kóksholaq», «Bazar, Nazar», «Kelinjan» jáne taǵy da basqa ánderi oryndaldy.
«Elimizdiń halyq aqyny, eńbek sińirgen óner qaıratkeri Kenen Ázirbaevtyń 125 jyldyq mereı toıy respýblıkamyzdyń birshama jerinde respýblıkalyq aqyndar aıtysymen, «Shyrqa daýysym» atty ánder baıqaýymen, taǵy da basqa ár túrli sharalarmen, Taldyqorǵan, Jambyl oblystarynda atalyp ótti, alty tomdyq shyǵarmalar jınaǵy shyqty, QR Ulttyq kitaphanasynda Kenen Ázirbaevtyń shyǵarmashylyǵyna arnalǵan «dóńgelek ústel» jıyny uıymdastyryldy, arnaıy kórmeler ashyldy. Kenen Ázirbaev 150 astam shyǵarmalardy ózi jazyp, ózi oryndaǵan aıtýly óner ıesi tarıhymyzda máńgilikke qalady», dedi Almaty qalasy ákiminiń orynbasary Serik Seıdýmanov.
