Almatyda kene shaqqan adam sany ósken
ALMATY. QazAqparat- Almatyda kún jylyp, kóktem kelgeli kene shaqqan adamdar sany artqan. Bul týraly óńirlik kommýnıkatsııalar qyzmeti alańynda ótken brıfıngte qalalyq qoǵamdyq densaýlyq saqtaý basqarmasynyń shtattan tys bas travmatolog-ortoped dárigeri Qanat Tezekbaev aıtty, dep habarlaıdy QazAqparat tilshisi.
Spıkerdiń aıtýynsha, ótken aptada 52 naýqas dárigerdiń kómegine júgingen, onyń 23-i bala.
«Keneler adamdardy kóbinese qala mańy men taý baýraılarynda shaqqan. Denege jabysqan keneni teriden alǵan kezde onyń biztumsyǵynyń qalyp qoımaýyn qadaǵalap, múmkindiginshe tezirek alyp tastaý kerek. Eger dárigerge barý múmkindigi bolmasa, dárihanada nemese kez kelgen basqa jerde satylatyn qysqyshy bar arnaıy pıntset qoldanýǵa bolady. Keneni barynsha jabysqan jerinen ustaý kerek, pıntsetti tistegen jerinen perpendıkýlıar ustańyz, keneniń denesin aınaldyrǵan kúıi alý kerek. Kóp uzamaı kene de teriden ózdiginen shyǵýy kerek», - dedi Qanat Tezekbaev.
Keneler negizinen adam terisinińeń jumsaq jerlerin shaǵady.
«Olarǵa mynalar jatady: qulaqtyń syrt jaǵy, moıyn, bastyń joǵarǵy bóligi, shyntaqtyń ishki jaǵy, qoltyq asty, ish, shap, jilinshiktiń ishki jaqtary, tize asty. Keneniń shaqqany bilinbeıdi, jándik jaraǵa aýyrsynýdy basatyn zat engizedi. Kene entsefalıtine jándiktiń ózi shaqqannan basqa, aýrý eshki men sıyrdyń shıki sútin ishý arqyly da juǵýy múmkin. Kóktemde jáne jazda keneler adamǵa kúnniń nemese túnniń kez kelgen ýaqytynda qaýip tóndiredi», - dedi dáriger.
Kene shaqqan soń, úsh kún ishinde shuǵyl profılaktıka júrgizý qajet.
«Dene salmaǵynyń 10 kelisine 1 ml dozada kenege qarsy ımmýnoglobýlın engizý nemese tıisti kestege sáıkes ıodantıpırın qabyldaý qajet. Entsefalıttiń asqynýy óte qaýipti, sondyqtan ony aldyn alý kerek», - dep keńes berdi spıker.
Onyń aıtýynsha, jeke qorǵanys sharalarynan bólek, qala mańyndaǵy aýmaqtarda da aldyn alý jumystaryn júrgizýdi usyndy.
Ol úshin kelesi sharalardy jasaý kerek: aýmaqtan qoqysty shyǵarý, úı janýarlarynyń júnin arnaıy quralmen óńdeý, olardy muqııat tekserý, kenege qarsy arnaıy ósimdikterdi otyrǵyzý, jerdi eski butaq, shópterden júıeli túrde tazalaý, kógaldy únemi qyrqý, keneden tazartqysh qustarǵa uıa salý, jándikterdi tasymaldaýshy kemirgishterdi joıý, qaqpanyń mańynda eni 100 sm úgindiler nemese qıyrshyq tas jol túrinde kedergi jasaý qajet«, - dedi Almaty qalalyq qoǵamdyq densaýlyq saqtaý basqarmasynyń shtattan tys bas travmatolog-ortoped dárigeri Qanat Tezekbaev.
