Almatyda kelinshekten taıaq jegen balaǵa psıhologtyń kómegi kerek
ALMATY. QazAqparat - Almatyda 35 jastaǵy áıelden taıaq jegen 10 jastaǵy balaǵa psıhologııalyq kómek qajet, dep habarlaıdy QazAqparat tilshisi.
Jasóspirim bul týraly adamdardyń quqyǵyn qorǵaý Ulttyq ortalyǵynyń mamandaryna aıtqan.
Ortalyq qyzmetkerleri búgin Almatyda baspasóz máslıhatyn ótkizdi.
«Áleýmettik jelidegi vıdeo qoǵamda qyzý pikir týǵyzǵany ras. Sondyqtan, men Astanadaǵy Adam quqyǵyn qorǵaý Ulttyq ortalyǵynan jedel jettim. Biz aýdandyq polıtsııamen, balalardyń ata-analarymen kezdestik. Qazir sot medıtsınalyq saraptamalar taǵaıyndaldy. Endi sonyń nátıjesine qaraı is sotqa beriledi. Bala psıhologııalyq kómekke muqtaj. Búgin onyń anasynan ruqsat aldyq. Endi onymen psıholog jumys isteıtin bolady», - dedi ortalyqtyń shaǵymdarmen jumys basqarmasynyń basshysy Rıshat Raqymov.
Quqyq qorǵaýshylardyń aıtýynsha, 35 jastaǵy áıeldiń is-áreketi qoǵamda ashý-yza týǵyzǵan. Tipti onyń mekenjaıyn suraǵandar da bar.
«Bala qylmys jazasyz qalmaıtynyn túsinýi kerek. Biz ol kelinshekpen de sóılestik. Óziniń is-áreketine ókinip otyr. Biraq onyń kinási qanshalyqty ekenin sot sheshedi», - dedi Adam quqyqtary jónindegi Qazaqstan halyqaralyq bıýrosy dırektorynyń orynbasary Roza Aqylbekova.
Taıaq jegen balanyń ata-anasy basynda aryzdanbaq oıy bolmaǵan. Keıin beınetaspany kórgen soń polıtsııaǵa júgingen.
Aıta keteıik, 6 maýsymda 35 jastaǵy áıel kórshisiniń balasyn soqqynyń astyna alǵan. Bul derek podezdegi baqylaý kamerasyna túsip qaldy.
Keıinirek sotqa deıingi tergeý reestrine tirkeldi.
