Almatyda Kedendik odaq elderi men EESQ arasyndaǵy erkin saýda jónindegi kelisimniń ekinshi kezeńi ótpek
ALMATY. 8 sáýir. QazAqparat /Ádilet Musahaev/ - 11 sáýir kúni Almatyda Kedendik odaq elderi men Eýropalyq erkin saýda qaýymdastyǵy (EESQ) arasyndaǵy erkin saýda-sattyq jónindegi kelisimniń ekinshi kezeńi ótedi,
dep habarlaıdy QR ekonomıkalyq damý jáne saýda mınıstriginiń baspasóz qyzmeti.
Kelisimsóz barysynda Islandııa, Lıhtenshteın, Norvegııa, Shveıtsarııa, Reseı jáne Belorýssııa elderiniń ókilderi bolady. Qazaqstandyq tarapty ekonomıkalyq damý jáne saýda mınstri Janar Aıtjanova basqarady.
EESQ-1960 jyly qurylǵan aımaqtyq birlestik bolyp tabylady. Maqsaty - qatysýshylarynyń arasyndaǵy erkin saýdany qurastyrý jáne ekonomıkalyq birigýdi nyǵaıtý. Qazirgi kúni Islandııa, Lıhtenshteın, Norvegııa, Shveıtsarııa EESQ-nyń múshesi bolyp tabylady. Olar birige otyryp úshinshi elmen saýdalyq preferentsııalyq kelisim jasaıdy. Búgingi tańda erkin saýda boıynsha EESQ-qa aımaqtyq bloktar men basqa da elder arasynda 20-ǵa jýyq kelisim jasalǵan. TMD elderi arasynda Ýkraınamen erkin saýda aımaǵy qurylǵan. Sonymen qatar Gonkong, Taıland, Perý, Aljır jáne Úndistanmen kelissózder júrgizýde. Indonezııa, Malaızııa, Reseı jáne Vetnammen konsýltatsııalar bastaldy.
