Almatyda QazUÝ túlekteri men ýnıversıtet stýdentteri arasyndaǵy baılanysty jalǵaıtyn ortalyq quryldy
ALMATY. 4 Qarasha. QazAqparat /Názıra Eleýhan/- Almatyda Ál- Farabı atyndaǵy Qazaq Ulttyq ýnıversıtetinde osy oqý ornyn bitirgen Túlekter qaýymdastyǵy janynan stýdentterdiń aqparat ortalyǵy ashylyp, óz jumysyn bastaıdy.
"QazUÝ túlekteri men ýnıversıtet stýdentteri arasyndaǵy baılanysty odan ári ulǵaıtý maqsatynda stýdentterdiń belsendilikke tartylýy ýnıversıtet úshin óte úlken joba bolyp tabylady. Bul dástúr shet elderde jaqsy qarqyn alǵan, mundaı ıgi bastamany QazUÝ stýdentteri qoldap otyr. Aqparattyq ortalyqtyń negizgi maqsaty - aǵa urpaq pen jastardyń arasyndaǵy zııaly orta qalyptastyrý, «altyn kópir» ornatý bolyp tabylady. Stýdentterdiń kókeıinde júretin suraq, túlekterdiń jetken jetistikteriniń negizi men salǵan sara joly qandaı?!» Ortalyq osynaý saýaldarǵa tikeleı jaýap izdep, aıqyn baılanys ornatatyn jer bolmaq", -dedi Túlekter qaýymdastyǵy atqarýshy dırektory Kýlǵazıra Baltabaeva.
Onyń aıtýynsha, jobany usynǵan QazUÝ-diń Ekonomıka jáne bıznes joǵary mektebiniń 2 kýrs stýdenti Dastan Qýbaev. Bul komandada ýnıversıtettiń 13 fakýltetiniń ókilderi jumys isteıdi. Jastardyń jańa tyń ıdeıalary men ınıtsıatıvalary dúnıege kelýi - bilim men ǵylymnyń basty jańalyǵy ári jetistigi. "Elbasy N.Á.Nazarbaev aıtqandaı: «Qazaqstannyń basty kapıtaly - bilimdi jastar». Bul joba ýnıversıtettiń bıik deńgeıli tuǵyryn taǵy bir tarıhqa bastamaq",- Onyń aıtýynsha, endi bilim ordasynyń stýdentteri men túlekterin «altyn kópir» jalǵamaq", - dedi ol.
Ortalyqtyń dırektory aldaǵy josparlarymen de bólisti. "Ótken jyly Elbasy N.Á.Nazarbaev QazUÝ stýdentterine arnaıy dáris oqydy, endigi kezek, «mınıstr kúnin» ótkizý",-dedi K. Baltabaeva.
