Almatyda QazUÝ-dy Ulttyq zertteý ýnıversıtetine aınaldyrý máselesi qaraldy
ATY. 12 qańtar. QazAqparat /Ádilet Musahaev/ - Keshe ál-Farabı atyndaǵy Qazaq ulttyq ýnıversıtetinde «Zertteý ýnıversıtetiniń bilim berý qyzmeti» atty ǵylymı konferentsııa ótti.
Shara barysynda otandyq ǵalymdar Ulttyq zertteý ýnıversıteti degenimiz ne jáne bul ataqqa laıyq bolý úshin ne isteý kerek degen ózekti saýaldarǵa jaýap izdep, talqylady.
Ǵalymdar álemdik top-ýnıversıtetter qataryna enýge birden bir aıqyn jol - joǵary oqý ornyn ulttyq zertteý ýnıversıtetine aınaldyrý kerektigin alǵa tartyp, qazaqstandyq bilim jáne ǵylym keńistiginiń álemdik ýnıversıtetter reıtıngisinen laıyqty oryn alýy úshin naqty josparlardy júzege asyrýdy qolǵa aldy.
QazUÝ-dyń birinshi prorektory Muhambetqaly Búrkitbaevtyń aıtýynsha, álemdegi eń joǵary top reıtıngterge engen oqý ordalarynyń bári de zertteý ýnıversıtetteri bolyp tabylady. «Ulttyq zertteý ýnıversıtetine aınalý ol tek bizdiń ǵana maqsat emes, ol úkimettiń de maqsaty dep aıtýǵa bolady. Jaqynda baspasóz betterinde JOO baǵdarlamalary jarııalanǵany belgili. Sol baǵdarlamada zertteý ýnıversıtetiniń túsinigi tolyq jazylǵan. Sonymen biz QazUÝ-dyń Ulttyq zertteý ýnıversıtetine aınalý baǵdarlamasyn quryp jatyrmyz», - deıdi prorektor.
Sondaı-aq Tomsk memlekettik ýnıversıtetiniń oqý jumysy jónindegi prorektory Aleksandr Revýshkın Ulttyq zertteý ýnıversıteti únemi talantty stýdenttermen tolyǵyp otyratyndyǵymen ǵana mańyzdy ekendigin aıtyp, zertteý ýnıversıteti ataǵyn alǵan bir jyl ýaqyt ishindegi jańalyqtar men ózgeristerin atap ótti.
Konferentsııada sonymen qatar, aldyńǵy qatarly sheteldik zertteý ýnıversıtetiniń tájirıbesi, zertteý ýnıversıtetinde magıstranttardy daıyndaý, ǵylymı jumystar, bilim sapasy, oqytýdyń ádis-tásili sııaqty basqa da taqyryp tóńireginde suraqtar qaraldy. Nátıjesinde ǵylymı jıynnyń qatysýshylary QazUÝ-dyń joǵary áleýeti men kampýsyn eskeretin bolsaq, bul bilim ordasy Ulttyq zertteý ýnıversıtetine aınalýy óte nátıjeli bolmaq degen paıymǵa keldi.
