Almatyda QazUPÝ stýdentteri jazýshy D. Dosjanmen júzdesti
Y. Qazannyń 12-si. QazAqparat /Erbol Turymbetov/ - Búgin Abaı atyndaǵy QazUPÝ stýdentteri belgili jazýshy, Memlekettik syılyqtyń, M.Áýezov atyndaǵy Ulttyq syılyqtyń laýreaty, «Qurmet», «Parasat» ordenderiniń ıegeri Dúkenbaı Dosjanmen júzdesti.
Kezdesý barysynda tanymal jazýshy stýdentterge elimiz ben sheteldik ádebıet álemine qatysty lektsııa oqyp, ómirlik eńbek joly men shyǵarmashylyǵyna qatysty suraqtarǵa jaýap berdi. Sonymen qatar, ýnıversıtet kitaphanasyna «Terezeniń jaryǵy», «Kogda ıa ýmıral» kitaptarynyń birneshe danasyn tabys etti.
Talantty jazýshynyń alǵashqy áńgimesi 15 jasynda jaryq kórgen edi. Qalamgerdiń kitaptary bul kúnde álemniń 20 tiline aýdarylyp, jalpy kólemi 3,7 mıllıon taralymmen basylyp shyqqan. Kitap palatasynyń Qazaqstandaǵy «Oqyrmany qısapsyz jazýshy» kýáligin alǵan. Onyń qalamynan 11 roman, 23 hıkaıat, 100-diń ústinde áńgime týdy.
Ol 1959-1964 jyldary S.M.Kırov atyndaǵy QazMUÝ-di úzdik bitirdi. 1963-1994 jyldar aralyǵynda kóptegen merzimdi baspasózderde, baspalarda qyzmet etti. 1994-1996 jyldary QR Avtorlyq jáne aralas quqyqtar jónindegi agenttiktiń bólim bastyǵy boldy. Al 1996-2002 jyldary QR Ulttyq bank murajaıynyń dırektory bolyp istedi. Qazirgi ýaqytta 2002 jyldan beri Prezıdenttik mádenıet ortalyǵynda «Mádenı mura», «Kýltýrnoe nasledıe» jýrnalynyń Bas redaktory bolyp qyzmet atqaryp keledi.
