Almatyda «QazTransGaz Aımaq» AQ qyzmetkerleri arasynda qysqy spartıkıada ótip jatyr
ALMATY. 14 qańtar. QazAqparat /Erlik Erjanuly/ - Búgin Almatyda «QazTransGaz Aımaq» AQ qyzmetkerleri arasynda Qysqy Spartıkıada bastaldy.
21-qańtarǵa deıin sozylatyn bul sharaǵa kompanııanyń Mańǵystaý, Aqtóbe, Batys Qazaqstan, Qostanaı, Qyzylorda, Ońtústik Qazaqstan, Jambyl oblystyryndaǵy óndiristik fılıaldary men Ortalyq apparattan 130-ǵa jýyq adam qatysýda. Olar 4 kún boıy shańǵy jarysy, fýtbol, ústel tennısi jáne shahmat boıynsha ózara saıysqa túspek.
«Búginde azamattardyń densaýlyǵy úshin ortaq jaýapkershilik qaǵıdasyn saqtaý, dene shynyqtyrý men sportty salaýatty ómir saltyn qalyptastyrýdaǵy mańyzdy faktor retinde nasıhattaý - básekege qabiletti jáne tabysty bolýdyń alǵysharttary. Sondyqtan bizdiń kompanııada saýyqtyrý, qyzmetkerlerdi dene shynyqtyrý jáne sportpen aınalysýǵa tartý jumystary korporatıvtik mádenıettiń ajyramas bóligine aınalǵan. Muny el turǵyndarynyń densaýlyǵyn jaqsartýǵa qosylǵan eleýli úles dep bilemiz» - deıdi «QazTransGaz Aımaq» AQ-nyń Bas dırektory Qaırat Sháripbaev. Onyń aıtýynsha, túrli qashyqtyqtaǵy shańǵy jarystary Almaty oblysy Talǵar aýdanyndaǵy Soldat saı shatqalynda ornalasqan «Alataý» shańǵy jáne bıatlon stadıondary kesheninde ótýde. Teńiz deńgeıinen 1500 metr bıiktikte ornalasqan bul sport nysany 2011 jylǵy 7-Qysqy Azııa oıyndaryna arnap salynǵan bolatyn.
