Almatyda «Qazposhtanyń» jańa bólimshesi ashyldy
ALMATY. Tamyzdyń 17-si. QazAqparat /Erbol Turymbetov/ - Búgin Almaty qalasy «Qulager» yqsham aýdanynda «Qazposhtanyń» zamanaýı tehnologııalarmen jabdyqtalǵan jańa poshta bólimshesi ashyldy,
dep habarlaıdy QazAqparat.
Endi turǵyndar poshta qyzmetimen qatar, sol jerde qarjylyq qyzmetterdi de paıdalana alady. Jańa bólimshe sońǵy úlgidegi barlyq talaptarǵa saı jabdyqtalǵan. Ǵımarat tolyq kompıýterlengen, joǵary sapaly telefon baılanysy, kúzet jáne oqys órt jaǵdaıynda belgi berý qurylǵylarymen qamtamasyz etilgen.
«Bul ashylyp otyrǵan №66-shy poshta bólimi aýdan turǵyndaryna kórsetetin qyzmetimizdiń sapasyn arttyrýǵa mol múmkindik beredi. «Qazposhta» Almaty fılıaly AQ poshta qyzmetimen qatar, qarjy qyzmetterin de júrgizedi. Munda aqsha aýdarý, jedel aýdarý, turǵyn úı jáne salyq tólemderin qabyldaý, zeınetaqy, járdemaqy, jalaqy jáne t.b. qyzmetteri kórsetiletin bolady», dedi «Qazposhta» AQ-nyń «Almaty shtamp» Almaty fılıalynyń dırektory Sáýle Egemberdıeva.
Búginde «Qazposhta» AQ búkil respýblıkany qamtyp otyrǵan iri poshta jelisine ıe. Onyń quramyna 3500 aýyldyq jerler de kiredi. Jańa №66-shy bólimshe 10 myń adamǵa qyzmet jasaıtyn bolady. Onyń ishinde, 300-i zeınetkerler bolsa, 12-si zańdy tulǵalar. Іshinde operatsııalyq zal men qoıma jáne seıfi bar ǵımarat 112.7 sharshy metr aýmaqty alyp jatyr.
