Almatyda «Qazposhtada» kezek sanyn azaıtýmen robot aınalysýda

ALMATY. QazAqparat -Almatyda poshta bólimshelerindegi kezek sanyn azaıtý maqsatynda robot-keńesshiler iske kirise bastady. Almatydaǵy alǵashqy «poshtobaı» robot K-Tech 2018 sammıtinde tanystyryldy, dep habarlaıdy QazAqparat tilshisi Qazposhtanyń baspasóz qyzmetine silteme jasaı otyryp.

«Baqyt» esimdi robot-keńesshi Almatynyń poshta bólimsheleriniń birine qoıyldy.

«Bizdiń kompanııa zaman kóshine ilesýge tyrysady. Biz jańa «Tsıfrly keńse» baǵdarlamasyn engizdik. Endi robot-keńesshi poshta bólimshesiniń jumysyn ońtaılandyryp, qyzmet kórsetýge ketetin ýaqytty qysqartady. Baqyt - elektrondy menedjer. Onyń qyzmetine klıentterge kompanııa usynatyn qyzmet túrlerin tanystyrý, poshta bólimsheleriniń mekenjaılaryn taýyp berý syndy qyzmetter de kiredi. Sondaı-aq, ol klıenttiń túrin esine saqtap alyp, kelesi joly tanyp, sálemdese alady», - dedi «Qazposhta» AQ-nyń Transformatsııa jáne aqparattyq tehnologııalar boıynsha basqarýshy dırektory Narıman Muqyshev.

Nurlan Muqyshev sypaıy robot klıentterdiń kóńilinen shyqqanyn aıtty.

«Kelýshiler robot qyzmetine dán rıza. Bólimshede kezekke turýshylar sany tipti joq dese de bolady. Jeke qyzmet qylý júıesi arqyly kelýshiler kerekti aqparatty ózderi bilip, sálemdemelerin ala alady. Robottyń qyzmetin bárinen de jastardyń qýana qabyldaǵany qýantady», - dedi ol.
 

2018 jyldyń sońyna deıin kompanııa Almatydaǵy taǵy eki bólimshege robot-keńesshi jibermek. Sonymen qatar, robottar Qaraǵandy men Shymkent qalalarynda da qyzmet etetin bolady.

Eske sala keteıik, 2017 jyldyń jeltoqsan aıynda Astana qalasynda Sáýle men Qýanysh esimdi robottar tanystyrylǵan bolatyn.